| Eve's Hochzeitsvorbereitungen |
|
|
1 .. 15 .. 27 28 29 30 31
|
16.10.13 11:56
Eve777 
|
Re: Eve's Hochzeitsvorbereitungen
Denn esch de Obe eigentli losgange mit Ässe etc., ich ha au jetzt no echli es Gnusch im Chopf und weiss gar ned rächt was ich alles söll do ineschriebe, s sind soooo viel tolli Sache passiert und ich ha s Gfühl ich wörd do allwäg locker 3 Siite fülle weni alles wet ufschriebe.
Nachem erste Gang esch die erst Überraschig cho für d Gäst und vorallem für mi Maa. Er het jo immer gfunde gha als Witz jo mir chönte doch eifach uf Las Vegas und eus det vomene Elvis loh traue. Ich ha denn immer gseit wart nur wenn mir emol hürote chunsch e Elvis über. Und so eschs denn au gsi, ha e Elvis-Imiatator buecht gha und de het e super Show anegleid, haha er esch mega lustig gsi und d Chinder händ alli tanzet und gmacht s esch eifach e coole Start i Obe gsi  . Mi Maa hets nüm gseh, er het mega Freud gha und ich glaube s het au de Gäst mega guet gfalle, sind jo doch es paar debii gsi wo i die Elvis-Generation ghöre  .
Eusi Gäst händ eus super härzigi und lustigi Überraschige gmacht de ganz Obe, unter anderem e mega schöni Powerpoint-Präsentation mit Föteli vo eus und vo allne Gäst und natürli esch au s Spieli "Du / Ich" oder wie das heisst dracho wo me mues Froge beantworte (das do wo sie amigs bi Glanz und Gloria spiele). S het no hundert anderi hammer Sache gä woni do chönt verzelle aber ich chas eifach ned rächt ufschriebe zum dem allem grächt wärde. Euse Hochzyytstanz z.B. esch mega schön gsi, oder d Torte wo euse Nochber für eus gmacht het etc.  . Was d Seerose betrifft muesi säge simmer absolut vo A-Z nur begeisteret, s Ässe esch super super fein gsi, s Servicepersonal mega fründlich und hilfsbereit und au bi de Musig händ sie beidi Auge zuedrückt und mir händ bis fast am 2 chöne abfiire . Am 3 simmer denn alli is Bett und händ denn am nächste Morge bim Brunche nomol mit allne Gäst chöne gmüetlich pläuderle (s händ fast alli dete gschlofe), das esch au mega toll gsi, so e gmüetliche Usklang vom ganze Fest. Mues au säge, so es hammer Dessertbüffet und Zmorgebuffet wie i de Seerose hani nonie neume gseh, ächt Wahnsinn gsi!!!
Eusi Gäst sind eifach nur super gsi, s esch soooooooooooo schön gsi mit allne z fiire, de ganz Tag esch vo sonere friedliche und fröhliche Stimmig treit gsi, s esch eifach nur wunder wunderschön und sehr emotional gsi. S händ sich alli total guet möge und das het me halt eifach gmerkt, s händ sich alli sooo fest für eus gfreut und das het me de ganz Tag gspürt, s esch eifach e unvergässlich schöne Tag gsi! Wie's de Elea au scho gseit het, ich ha mir nie chöne vorstelle wieso me seit es sigi de schönsti Tag vom Läbe, aber s esch wörkli eifach mega es speziells Gfühl wo me am Hochzyytstag het. Ich hoffe natürli dass mir no viel wunderschöni Täg dörfe erläbe, aber ich glaube scho dass sones Hochzyytsgfühl eifach eimolig esch und me das eso wahrschindlich wörkli nur eimol het. Ich merkes au jetzt bim schriebe, do sind so viel Emotione a dem Tag wo uf eim iprassle, ich ha mi Bricht überhaupt ned eso chöne schriebe wie ichs eigentli hät welle will ich au jetzt paar Wuche nachhär immer no merke dass es eifach z viel esch zum erfasse.
Ich und mi Maa wärde euse Hochzytstag uf jede Fall immer so schön und vollkomme in Erinnerig bhalte wies für eus gsi esch, s esch für eus persönlich wörkli eusi Traumhochzyyt gsi . S esch au schön wenn me merkt dass d Gäst de ganz Ufwand etc. z schätze wüsse und s händ wörkli alli gseit s sigi so schön gsi und sie hege sich eso wohl gfühlt, das esch doch s schönste Komplimänt findi .
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
1 .. 15 .. 27 28 29 30 31
|
Anmelden
, jo s esch eifach so schwer zum alles eso ufschriebe wie mes empfunde het, irgendwie chanis eifach immer nonig in Wort fasse und s sind soo viel mega schöni und spezielli Sache gsi de ganz Tag, ich glaube do chönti grad es Buech schriebe weni jedes Detail möcht verzelle *g* 