Re: Hochzeit Sibeli - 1. Teil (Ziviltrauung) - 2. Teil
Liebi Fraue
Ech schulde eu scho laaaaang de zwoiti Teil vo eusem Hochsig. Äntli händ mer au d'Föteli öbercho:
D'Woche vorem kirchliche Hochsig han ech frei gha zom no so s'eint oder ander chline z'mache. Eigentli hani planet gha, dass mer am Friitigmorge eusi Obiglocation för de Samstig chönd dekoriere, dass de am Samstig alles parat esch. Naja, planet wärs jo guet gsi...
Ech ha de am Zischtig mol eusem Vermieter aglüte ond gfroget, wenn mer denn am Friitigmorge i Ruum chönd. Er hed mech de ganz erstuunt gfroget: "jo, send denn ehr bereits am Friitig scho im Ruum?". S'hed sech de usegstellt, dass de Depp (sorry, chas grad ned andersch säge) de Ruum, wo mer vo Friitig bis ond met Sonntig för eus gmietet händ, am Friitigobig no i öperem anderem vermietet hed. A dem Zischtigobig hätt ech de glaubs chönne go umbringe. Ech be sooo entüscht gsi, well ech mer eifach emmer vorgstellt ha, dass ech de de Ruum fix ond fertig cha hälfe dekoriere ond de auno gsehne vorem Hochsig. Naja, nachdem mech min GG den beruhigt gha hed, händ mer eus of d'Suechi noch liebe Helferli's gmacht, wo för eus am Samstigmorge, wenn mer jo scho Programm händ, de Ruum düend dekoriere. Das hed denn au super klappet.
Nochdem das Problem glöst gsi esch, hed de Samstigmorge chönne cho. Ech ha bi de Trauzügin deheime gschlofe ond wörkli erstundlich guet. Mer send de noch de 6ne am Samstigmorge uf, händ öpis chlises zmörgelet ond send de zom Coiffeur. Det händ mer beid eusi Frisur öbercho ond send auno grad gschminkt worde. Dasch aso super Service gsi ond am 9ni send mer denn au bereits fertig gsi.
Nocher send mer hei zue ond händ erstundlicherwiis noch rechtig förig Ziit gha, well mer jo ersch am 10ni händ müesse parat stoh. Mer händ denn no schnell en Staffel "Sex and the city" gluegt ond send eus de gemütlich go alegge. Punkt 10ni send denn de GG ond de Trauzüge vor de Türe gstande ond mer händ eus denn s'erstmol gseh. Esch ganz en schöne Momänt gsi.
Denn heds gheisse, ab zo de Fotilocation. Mer händ imene schöne grosse öffentliche Garte Föteli gmacht. Es esch eifach scho rächt chalt gsi, vorallem för d'Trauzügin ond mech met eusne Kleider ond nor met emene Bolero (ca. 2 - 3 Grad). Nochere Stund Fötele send mer denn zo mine Eltere hei, wo bereits di beidne Fameli met Ahang of eus gwartet händ. Det händ mer de im Garte no d'Famelieföteli gmacht ond nocher send mer ad Wärmi öpis chlises go ässe.
Bald scho esches Ziit gsi, zom id Kile go. Di gladnige Lüüt send bereits dor Tätschmeister empfange ond id Kile gleitet worde. So händ eus d'Lüüt ersch bim inelaufe id Kile s'erstmol gseh. Prompt wo mer zo de Kile abe gfahre send, hed s'erstmol d'Sonne vöregluegt ond es esch herrlich gsi, denn so id Kile ie z'laufe. D'Kile esch genial gsi. Min GG und ech send beid ned extrem gläubig, aber sonen Hochsigsgottesdienst wie mer gha händ, wetti ned misse. Mer händ en chlini Bläserformation gha, wo i de Kile Musig gmacht hed ond die send eifach de hammer gsi. Ech ha am afang emmer s'Gfühl gha, dass doch en Sänger vell besser d'Stimmig öberbringt bimene Hochsigsgottesdienst, aber die Blasinstrument händ so guet tönt i de Kile, wörkli hammer.
Noch de Kile esch jo denn de Teil cho, wo mer norno händ chönne gnüsse ond nüd meh händ müesse studiere. Wo mer us de Kile use cho send, hed dosse bereits en Mähdrescher met Sofa voredroffe of eus gwartet. Alli Gäste händ denn müesse vorus laufe ond mer händ döffe ofem Mähdrescher höckle ond send zo de Aperolocation (nur ca. 200m entfernt) chauffiert worde. Dete send bereits d'Füürwehr, d'Skiriege, im GG sis Gschäft und beidi Turnverein vo eus Spalier gstande. Dasch mega gsi. Chum send mer dor d'Lüüt dore gsi, esch au scho di ersti Ufgab för mech cho. Ech ha müesse met emene Pneulader (min Maa dued Bagger ond co. flicke) Wiiswii osere Fläsche Wiiswii, wo voredra agmacht gsi esch, i Gläser ischänke. Natürlich noch Aleitig vom GG. Das hed denn au "meh oder weniger" klappet ond mer händ nocher chönne metenand astosse ond de Apero eröffne. Denn esch es eigentli Schlag of Schlag wiitergange met gratuliere, Darbietig vom Turnverein (mi GG hed müesse Barreturne) ond wiitere Darbietige. Mer händ aber glöcklicherwiis di letzt halb Stund auno öpis vom Apero ond de Lüüt gha.
Öpe am 6i esches wiitergange zo de Obiglocation. Mer händ eigentli planet gha, met eusne Gäste zäme per Car det äne z'fahre. Plötzli esch aber en wiissi Limousine för eus parat gstande ond mer händ de met de Trauzüge en gmüetlichi Fahrt met Champagner det inne gnosse.
I de Obiglocation han ech zersch mol Deko bestuunt ond de liebe Helferlis, wo igsprunge send, es grosses Lob gmacht. Es esch alles so gsi, wie ech's mer vorgstellt ha. Zom Znacht hed's bi eus es Salatbuffet ond div. Grillade inkl. Baked Potato gäh. Es esch sehr fein gsi. Au am Obig esch bi eus rächt vell gloffe. So händ mini Kolleginne ganz en lässigi Vorfüehrig gmacht. Au eusi beide Famelie zäme händ en Darbietig gmacht.
Nämmli Musikantenstadl. Min Schatz ond ech händ wörkli zom Teil Träne glachet, vorallem bim Stadl-Ballet, das send eusi beide Vätere gsi, wo met emene Tütü verkleidet "ometanzet" send.
Nocher händ mer es feins Dessertbuffet döffe gniesse ond de Obig met Musig vomene DJ lo usklinge. Schlussäntli send mer met de restliche Gästeschar, wo no möge hed, am morge am 7ni hei zue.
Deheime hed eus denn en chlini Baustell vor de Huustüre erwartet. Zodem händs eus i de ganze Wohnig Rüebli versteckt gha. D'Schlafzimmermöbel send met de Stubemöbel usgwächslet worde ond so send mer zwe denn eifach i de Stube inne am halbi achti müed aber öberglöcklech i euses Bett go pfüsele.
De ganzi Tag esch soooo lässig gsi ond öberwältigend. Mer hättid nie dänkt, dass sooo vell Lüüt werdid cho ond met eus fiire ond sech met eus freuid. Emmer, wenni weder dra dänke, chond mer weder öpis neus schöns oder lustigs i Sinn.
Oh, danke für de schön und usführlichi Bricht - tönt mega lässig. Und du hesch es wunderschöns Chleid gha, gfallt mir mega! Ich wünsch euch witerhin nur s'allerbescht!
Anmelden
26.Juni 2010, unser schönster tag....
gluegt ond send eus de gemütlich go alegge. Punkt 10ni send denn de GG ond de Trauzüge vor de Türe gstande ond mer händ eus denn s'erstmol gseh. Esch ganz en schöne Momänt gsi.