So Mädels. Han denkt ich erstelle jetzt au mal min eigne Thread, de chani da chli brichte wie eusi Vorbereitige laufed und verlüre nöd de Überblick :)

E Huufe hani scho im 14er Thread verzellt, fange da aber glich nomal vo vorne a.

Min Schatz und ich hend eus am Valentinstag verlobt. Da er im 3Schicht-Modus schaffet hemmer a dem Tag vom morge am 3 - am 10ni wo ich ha müesse go schaffe Ziit gha fürenand. Ich ha natürlich gschlafe wo er heicho isch und überhaupt nüt gahnt. Woni de verwachet bi hani ihm sofort welle mis Gschenkli bringe. En Babystrampler. Dadezue gits für eus e chli e spezielli Gschicht: GG hed im Dezember Geburi und ich ha ihm Händsche gschenkt. Er hed gmeint es seg en Strampler und isch denn au chli knickt gsi. Mier hend beidi vo de erste Minute a de gmeinsam Chinderwunsch gha und für ihn wär das es Bindigszeiche gsi. A Wiehnachte hani a das schowider nümme denkt und er heds heimlich wieder erwartet. Churz vorem Valentinstag bini im C&A ane Strampler gloffe wo 'I have an idea...:)' drufstaht. Und de hani grad gwüsst, das isch z perfekte Gschenk Also hanis ned chönne erwarte, ihm mis Gschenkli zgeh. Bin sofort ufegsprunge id Stube und finde mich imene Meer Cherzli wieder. GG hed Rose, Praline und Sekt ufe Tisch gstellt und bsorgt und isch i de Chuchi am Schinkegipfeli mache gsi. I dem Moment bini scho de Träne nöch gsi will min GG i so Sache eher ned so ufmerksam isch. Bin total euphrisch gsi und ha ihm denn als ersts mis Gschenk überreicht. Er isch völlig grüehrt gsi und hed das denn grad als Ileitig für sin Atrag gno. In mitte vo all dene Cherze heder mier denn total nervös die Frage aller Fragen gstellt, mit Ring und allem drum und drah. Ich bin sofort i Träne usbroche und ha nur no es gequitschts 'oh gott ja' usebracht. Han es Bild vom Verlobigsring aghänkt :)

Ich glaub ab dem Moment bini zume absolute Brautzilla mutiert Bi eus gits kein Tag ohni s'Thema Hochziit. Wie das so chli normal isch, plan ich alles, bastle und organisiere und GG git denn eifach s'okay oder so no-go
Gmeinsam hemmer entschiede, das mier soviel wie möglich möchted selber mache. Eusi Hochziitsfarbe wärded peach/apricot/light rose und ivory. Mier wärded keis Motto ha, aber dekoriert wird im Vintage Stil.
D'Familiy & Friends vom GG sind us Dütschland und mir möchted d'Übernachtig gern spendiere und da es Hotel euse finanziell Rahme würd sprenge hemmer eus entschlosse es Huus zmiete womer alli unterbringed. Oft sind das ja so 'Lagerhüüser' mit Masseschläg. Das isch für eus aber ned die optimal Lösig gsi. Hend e Huufe Hüüser agluegt und jetzt eis gfunde wo Einzel-/ Doppel- & Drüerzimmer hed. Usserdem au zwei 6er und zwei 5er Zimmer. Dett hemmer denkt chönd ja eusi Kollege schlafe, das isch sicher au mal wider luschtig, so das Lagerfeeling
Im Huus heds agrenzend en Saal womer wärded fiire. Dett dekorieremer alles selber und wärded en Candy Bar ha :)

s'Zivile wemmer gar nöd fiire. Da das en Tag vor eusem grosse Tag stattfindet, wemmer eher chli meh Geld is kirchliche investiere und ufs Standesamt nur mit TZ, Eltere und Gschwüschterti. Nachher no öppis go trinke und esse. Da mier ja denn au no de Saal wend go dekoriere usw. liit eigentli gar ned meh dinne.

Kirchlich hürate wärdemer im Oberschönebuech/SZ wo ich ufgwachse bi inere chline Kapelle, dett hend ca. 50 Persone platz. Das isch perfekt für eus. Mier isch das mega wichtig gsi, ich han scho als chlises Meitli gseit das nur de Ort für mich in Frag chunnt. Dett denkt mer aber halt no ned unbedingt drah, dass es ja au am andere Part gfalle sött Min Schatz hed sich aber au sofort id Kapelle verliebt, was mich soooo glücklich macht Ich hänk mal en Video a wod Kapelle zeigt wird :) http://www.youtube.com/watch?v=zC-qKvejInU


Die wichtigste Eckdate:
- Mir hürated zivil am 16.05.2014.
- kirchlich am 17.05.2014


erledigt hemmer scho:
- Zivilstandsamt reserviert
- Chile und Pfarrer reserviert
- Apérocaterer buecht
- Catering für am Abig buecht
- Festlocation buecht
- Übernachtig Gäst organisiert
- Fotografin buecht
- Azug GG
- Prototyp Iladig, Tischkarte, Menü erstellt
- Torte usgsuecht
- Band für d'Chile agfragt

To do:
- Bruutchleid
- Chleidig zivil für beidi
- Blumen
- Ringe (mer hend Favorite)

Das isch alles wasmer grad in Sinn chunnt. Ich hoffe dasi da chli zemefassend cha brichte, damit au mier de Fade nöd verlüred, hihi.

wow das tönt mega romantisch mit dim Atrag :)
und dis datum
ich han scho s schöne wetter bstellt :)

übrigens, s gaht na 288 Tag

Mega cool hesch ou ä eignä Thread gmacht!!! Di Atrag isch würklech meeeega romantisch... Zum dahiischmelzä!

Ahhh jetzt gsehni grad wo dini Motivation her chunnt

so luschtig dini Gschicht. Es passiered sooooo schnell so Sache, hihi!
DIE Haartüecher hani zum erste Mal i mim Lebe im Mai das Jahr gseh! Jetzt liebi sie! Am GG sini Oma hed mier so eis id Hand drückt und ich ha kei Ahnig gha, wie das funktioniere söll. Sie heds leider au ned gwüsst und dur pröble hani de usegfunde wie praktisch die Dinger sind. Ha scho gseit schenke de minere Muetter und Schwöschter so Dinger uf d'Wiehnachte. Bi ihne laufi glaub ned Gfahr dass sie was verwächslid

Jööööö :) so schön!
Was isch das de 100 jahr kalender?

@littlefoot

http://kalender.rohrmann.com/cms/2014
Das da isch de hundert jährig Kalender. Uf de Infosiite chaschs nochli nahlese... Es isch wohl chli Aberglaube... Aber da de Aberglaube sehr zu eusne Gunste spielt, glaubi ganz fest drah ;))

@Lula
Hehe, ez entdeckschne und ich bi so schrecklich schribfuul und teile ja eh scho alles im 14er Thread...

Hihi muess mi mal unbedingt wider da inne ustobe. Bi sitere Wuche gsundheitlich recht agschlage und hend soviel ztue im Gschäft, dasi eifach nid wirkli dezue chume... Aber bald iher Liebe!!