So Fraue, ich chas also definitiv unterschribe. Es isch de schönscht Tag i mim ganze Läbä gsi!
Am Friitig simmer de ganz Tag no beschäftigt gsi mit Vorbereitige, hend eusi ganz Deko i die verschiedne Locations bracht, nochli baschtlet und viel organisatorischs gmacht. Am viertel ab 5i hani denn de Termin gha zum d Nägeli mache. Min GG hed mich anegfahre und mier hend eus vonenand verabschieded. Ganz traditionell hemmer d Nacht welle getrennt verbringe. Will ich gar nöd schöni Nägel ha, hemmer fascht müesse Gelnägel mache. Aber sie heds soooo schön gmacht. Dezent ime rosepeach Ton und ufem Ringfinger echli Glitzer. Woni fertig gsi bi sind mis Mami und mini Schwöschter mich go abhole und mier sind ganz gmüetlich uswärts go esse. Hends so schön gha. Ich bi überhaupt nöd nervös gsi, kei Moment lang. Nachem esse simmer hei und ich bi mit zu minere Schwöschter. Mier hend de nochli gredet, chli Abläuf besproche usw. Am halbi 12i bini de is Bett, mini Schwö hed mier ihres Bett abotte, dasi guet cha schlafe. Und sie hed de ufem Sofa gschlafe. Ha am GG no es Whatsapp gschribe, wie sehr ich mich uf morn freue. Er hed mit sim TZ deheime gschlafe und die hend sich wohl en super Abig gmacht :P ischlafe hani super guet chönne, null Nervosität und denn..... KEEEEI STUND isch vergange und ich bin hellwach gsi, total nervös am umstudiere obi echt alles ha, obi nüt vergässe ha, wie GG wohl reagiere wird, ob alles guet gaht… Und so isches öppe die ganz Nacht wiitergange. Am 5i bini de verwachet. Mini Nase isch gloffe, min Hals zue… Super oder? Und de ischmer no in Sinn cho, das ich ja die Gelnägel drufha und ned weiss, wieni jez mini Linse söll id Auge bringe Das hed mich so dermasse nervös gmacht, dasi de irgendwenn am viertel vor 6i glaub ufgstande bi go die Linse inemache (was erstuunlich guet gange isch) De bini go dusche, ha mi parat gmacht, Trainer agleit und bi zu mim Mami übere (mini Sis und mini Eltere wohned direkt gegenüber, aber bi mine Eltere baueds um, drum hani nöd dette welle schlafe). Sie isch scho hellwach gsi und total nervös. Mier hend no en Kafi trunke und sie hed gfunde ich söll doch öppis esse aber mier isch bim Ablick vo dem Zopf halbe übel worde, dasi nüt abebracht ha. Und scho isch halbi 8i gsi und mier hend müesse los zum Coiffeur. D’Coiffeusin isch so härzig gsi und hed mier denn als ersts en Tee abotte willi scho so verpfnüslet usgseh ha. Nach öppe 20 Minute simmer denn umgstiege uf Neo Citran was sin Dienst wirkli tah hed. Hed sofort gnützt :) Als erst hed sie mier d Haar glocket mit some meeeega coole Grät, und zuesätzlich hed sie de Oberkopf uf Volumewickler dreiht. Am 9i isch mini TZ cho zum mich schminke. Sie hed das so schön gmacht. Han nachher au uh viel Kompliment becho. Während ich gschminkt worde bi hed mini Coiffeusin mini Schwöschter frisiert und bi mier die Locke mal wirke lah. Denach ischs aber grad wieder wiitergange bi mier. Am halbi 11i isch eusi Dekorateurin mit de Blueme cho: Bruutstruss, Armbänder & Asteckerli. Ich sägs eu, soooooone schöne Struss han ich mier niemals vorgstellt. Ich bi voll überwältiget gsi und hett scho fascht mini erste Tränli verdrückt. D Dekorateurin isch gange und scho isch d Fotografin cho und hed einigi Momet festghalte vo de Vorbereitige. Denn simmer zeme zu minere Tante gfahre wo au min GG sich vorbereitet hed. Ha minere Muetter de aglüte, dass sie min GG ines Zimmer verfrachtet won ich nöd bi. Alles guet gange, sind a ihm verbiighuscht und ich ha dörfe i mis Chleid schlüfe. Soooo schön! d Fotografin hed zerscht bi mier und denn bim GG Föteli vom alegge und vo de Details gmacht und isch denn mitem GG veruse das mier dette chönd s First Look Shooting mache. Wo sie mich isch go hole hed sie scho gseit das er enorm nervös seg Denn hani endlich dörfe uf ihn zuelaufe. Ha ihn uf de Schultere atippt und er hed sich umdreiht. Sin Blick isch de wahnsinn gsi. Er isch total grüehrt gsi, hed mier tuusigi Kompliment gmacht , sogar es Trändli hed er verdrückt und ich glaub mier sind echt es paar Minute dett im Gras gstande und hend d Welt um eus ume total vergässe Denn hemmer es paar Bilder gschosse i dem Gras usse. Unter mim Chleid sind gfühlti 100 Chrabeltierli gsi und ich ha so müesse ufpasse das ich mich uf d Bilder konzentiere. Plötzli simmer de in Stress cho und hend schnell schnell müesse los zu de Kapelle mit eusem schöne Chäfer. Unterwegs hend eus alli gwunke und zuegrüeft. Uh luschtig A de Kapelle acho hend eusi TZ und de Diakon dusse uf eus gwartet. Mier sind beidi sooo nervös gsi. GG aber no viel meh als isch. Sini Händ sind komplett blau agloffe, so öppis hani echt no nie gseh und er hed voll zitteret. Fascht hetti mier Sorge gmacht De simmer usem Auto usgstiege, hend eusi TZ begrüesst und ich bi vorgloffe richtig Kapelle. Min GG hinnedri und staht mer voooooll uf s Schleppe *schhhrrrrrrrzzzzzz* e voilà, en riiiiiiiese Riss unne am Chleid. Das hed eusi Nervosität natürlich au ned grad gschmäleret aber guet.
Passiert isch passiert. Mier hend vor de Kapelle no en churze Moment Luft gholt und sind denn zeme izoge. D Band hed so wunderschön de Izug gspielt dasi dette scho ha müesse brüele und woni i dLüüt gluegt ha sind denn dDämm endgültig broche. Alli sind da gsi, alli d Trauuig isch wunderschön gsi. Persönlich und witzig. Am GG sin Brüeder hed eusi Häsligschicht vorgläse, de Diakon hed viel persönlichs zu eus gseit und hed eus es Schild überreicht mit de Ufschrift „Haussegen“ und nebedrah isch en Wasserwaag ibaut gsi. Das isch so luschtig gsi Während allne Lieder hend mich d Emotione wieder voll packt. S Ja Wort hemmer luut und dütlich gsproche und scho isch de ganzi Spuk verbii gsi. Alli Gäst hend vor de Kapelle uf eus gwartet und hend eus en wunderschöne Empfang mit de WeddingBubbles bereitet (wo übrigens kei Flecke hinterlah hend!). Nachdem mier e Huufe Gratulatione entgegegno hend, sind mier als erst losgfahre und hend d Kolonne richtig Apero agfüehrt. Vom Apero han ich leider echt nur mega wenig mitbecho, jede hed welle cho gratuliere und Bilder mache Mini TZ hed super zu eus zwei gluegt und hed eus mit ztrinke und zesse versorgt. DZiit isch leider viel zschnell verbii gange und scho hemmer wieder müesse los zude Location zum dette au nomal Föteli zmache bevor d Gäst chömed.
Mier hend d Türe vo dere Schüüne ufgmacht und mich heds schier hinne usegrüehrt. Es isch no viel besser und schöner worde als ichs mier je erdenkt hed. ALLES isch so detailliert vorbereitet gsi. Wunderwunderschön! Mier hend de es paar Bilder dörfe mache i de Location und denn plötzlich hed dFotografin eus voll afange hetze, dasmer müessed d Location wechsle. Mier sind denn chli gloffe hinter d Location und dett wieder is Gras (haha hallo Viecher). Wie bstellt isch denn d Sunne usecho und hed en wunderschöni Stimmig für eus zwei gmacht. dFotografin isch voll nervös worde, das mier ez sofort zrugg müessed… Mier natürlich nichtsahnend gfolgt. Sie hed eus denn ‚befohle‘ dusse stah zbliibe bis Musik chunnt und denn dörfemer ine und müessed uf d Bühni laufe. Nach öppe einere Minute ertönt ‚Sweet Child O’Mine‘, s GC Ilauflied. Ich ha denkt alli werded dinne sitze und das isch so wieder typisch au euses Begrüessigslied aber alli sind gstande und hend richtig Bühni gluegt. De simmer uf d Bühni gstande und alli Gäst hend en wisse Karton ufeghebt. EN CHOREO FÜR EUS! Wie im Fuessball :D eine nachem andere hed zwüschet dene wisse Kärtön Motiv ufeghebt wo eus a die jenig Person und a luschtigi Situatione erinneret. Sooooo luschtig. Nachdem s Lied fertig gsi isch, hed d Kollegin uf de Bühni gseit, das ich ja immer verzelli, ich well mal CAPO si im Stadion und de Fans d Fangsäng astimme und jetzt heb ich endlich d Chance dezue. Ha denn es Megaphon becho und min GG e Trommele und mier hend ihne en typische Klatschruef us eusere Fankurve müesse biibringe. Ich ha sooo glachet. Sogar min Papi hed voll mitgmacht. Das isch sone geniale Uftakt ine perfekte Abig gsi. De erst Gang isch serviert worde und de DJ hed währenddesse Saxophon gspielt und gsunge. Er isch eifach de wahnsinn gsi. De ganz Abig. Mier hend soooo viel Spass gha mitenand Nachdem mier de erst Gang fertig gha hend isch mini TZ uf d Bühni und hed erklärt, das alli uf em Tisch es Chärtli hend miteme Name druf. Jede Name hed es Gegestück, z.B. Adam und Eva, Susi und Strolch usw… De hed jede sin Partner müesse go sueche und mit dem im Photobooth es Föteli go mache… Ha das so super gfunde will das d Lüüt nomal ufglockeret und unterenand bekannt gmacht hed. De Photibooth isch voll de Renner gsi! Chani aso jedem nur empfehle!! Mier hend de zweit Gang gesse und scho isch wieder s nächste Spiel agstande. En Ehetest. Das typische Hochziitsspiel womer Rugge a Rugge sitzt und en Schueh (i eusem Fall sinds Blätter gsi) ufehebt wer was meh macht oder so. Für jedi überistimmend Antwort hemmer e Priis übercho: Tortegable, will mini Schwiegermuetter wo das Spiel gleitet hed, de Meinig isch, das eus das fehlt im Huushalt Au das isch wieder mega funny gsi und scho ischs wieder wiitergange mitem Hauptgang. GG hed s Buffet eröffnet und mier hend soooooo viel gesse. Da mier direkt bim Buffet eusi Plätz gha hend sind aber alli immer chli bi eus gsi und mier hend wirkli mit jedem chli chönne pläuderle. Nachem esse sind plötzlich am GG sini Schwöschter und sini Cousine so uh herzig verkleidet vor eus gstande. Sie hend denn e mega herzigi Red ghalte, dass de GG ja usgwanderet seg vo DE und dass sie sich jetzt au chli wend Müeh geh zum Schwiizerdütsch rede und drum hebeds öppis istudiert. De fangt doch voll d Musig vo Ewigi Liebi a und sie hend de Text voll uf eus apasst und uf Schwizerdütsch gsunge. So geil, ich bi definitiv nöd die einzig gsi wo da Träne glachet hed. Ez hoffi soooo fescht, das irgendöpper das uf Video ufgno hed :D
D Schlag auf Schlag ischs wiitergange und am GG sini ganz Family isch verkleidet in Saal cho, hed es Lied gsunge vowäge mier gönd uf Afrika und bruched chli Geld. Das hend so witzig verpackt und hend würkli alli so Safarichleider und Feldstecher und Hüet agha. Hammer! Am Schluss hends eus en Huufe Feriegeld wo sie igsammlet hend ufe Tisch gleert Nachdem mier alli chli verschnuufed hend, chli da gschwätzt und dett gschwätzt, hed de TZ uf de Bühni scho sini nächst Red gschwunge, er hed vom Polterabig vom GG verzellt, das ich jetzt nöd söll iversüchtig werde aber am Polterabig seged zwei Fraue die ganz Ziit ume GG umegschliche und hebed ihn nümme in RUeh glah und nach langem hin und her heb er sie jetzt halt iglade. Zu so orientalischer Musik sind denn GGs Muetter und Tante voll verkleidet inecho und hend voll de Buuchtanz hiigleit Am GG sini Muetter isch buuchfrei gsi und sooo geil. Gliichziitig hends afange d Lüüt animiere zum mittanze, da GG und ich eus ganz spontan geg en Hochziitstanz entschiede hend. D Party isch also somit gstartet. Es isch voll Bewegig in Saal cho und de DJ hed echt alles geh. Mier hend s Candybuffet eröffnet und dTorte agschnitte und es isch alles so riibigslos gloffe. Ich han soooo unglaublich viel Kompliment für die ganze Details i de Deko becho. S Candy Buffet isch ununterbroche grüehmt worde und alli sind so begeisteret gsi.
Am vieri am Morge simmer denn völlig K.O. heicho und GG hed mier fründlicherwiis no usem Chleid gholfe bevor mier halb tot is Bett gheit sind….
Es isch en perfekte Hochziitstag gsi für eus. Mit viel Emotione, viel strahlende Gsichter und all eusne Liebschte. Eusi TZ und TM hend das so wahnsinnig gleitet und organisiert, mini TZ hed sich bi mier entschuldigt und gseit, sie gseht jetzt, wieso ich so viel Arbeit i das ‚Projekt‘ gsteckt ha und dases sich soooo glohnt hed. Und ja, au ich gseh das genau so. De Tag hed mich für alli Müehe, für jedi gnervt, verruckt und enttüschti Situation entlöhnt. GGs Gsicht zgseh woner sich umdreiht hed am Morge isch de schönscht Moment i mim ganze Läbä gsi und ich bin momentan gfühlt die glücklichst Frau uf de Wält
Fraue, freued eu uf de Tag!!!
Bilder vo eus folget hoffentli bald vo de Fotografin :) Ich hänk eu mal die Bilder a, woni gschnell ha dörfe mache i de Location vo de Deko. Die einte hend im fb ja schomal s Bild vom Candybuffet gseh :) Ah übrigens, d Torte isch eifach nur perfekt gsi! Wie oft hani wohl jetzt ‚perfekt‘ gschriebe? :D … Mängisch gits eifach keis anders Wort zum die Moment beschribe!
Wooow Janedoe!! Was für en Bricht <3 So schööön!! Gratuliere eu vo ganzem Härze zu euere Hochziit!!! So schön hät alles klapped und funktioniert! Au mit de Sache zwüsche dure, da händ sich eui TZ au no es paar kuuuhli Sache überleit (hihi e Choreo so e lustigi Idee..) Und für de Photobooth händs e super Idee gha.. Und das au die anderne voll mitgmacht händ, sindi Family, Mamis, Cousine, mega kuuhl :) Isch dämfall din Papi glich au cho? Und eui Deko isch würkli meeeega schön. Echt de hammer!! :) Und voll härzig vo de TZ, dass sie sich no entschuldiged hät.. Und ich bin mer jeze echt am überlege, öb mer au es First Look Shooting sölled mache. Es dönt so schööön . Ville ville liebe Dank für de tolli Bricht und Föteli!! Schwebeder immer no uf Wulche 7? Händer no chli frei oder gahts gad wiedr los mit schaffe?
Wooow liebi, das tönt sooooo schön alles Ich freu mich für dich, dass alles so traumhaft abgloffe isch. Warte scho uf fotis mit dir druf De struss und deko, en traum...freu mi scho mega uf d artikel woni de darf bruche bi de gspannt was verzellsch vom photobooth, super idee mit dene chärtli. Wie hender d belüchtig gha?
Wow Jane, sooooo en schöne Bricht. Freu mi so für dich dasd so en super Tag gha häsch, au wättertechnisch!! Es isch so schön wie die Detail ufenand abgstumme gsi sind und din Brutstruss isch de Hammer!! Chan dir nur gratuliere!
härzligi gratulation! sooo e schöne bricht! wuri deko, d blueme und alles, seht soo super us! de bruutstruus isch wirklig mega schön! so schön hän euri tz sich doch soviil sache übrlegt! und übrraschige hets au gäh, mega schön/toll/perfekt!
ich wünsch euch vo härze alles gueti für euri gmeinsami zuekunft as maa und frau! und freu mi scho uf no meh föteli
Anmelden
Das hed mich so dermasse nervös gmacht, dasi de irgendwenn am viertel vor 6i glaub ufgstande bi go die Linse inemache (was erstuunlich guet gange isch) De bini go dusche, ha mi parat gmacht, Trainer agleit und bi zu mim Mami übere (mini Sis und mini Eltere wohned direkt gegenüber, aber bi mine Eltere baueds um, drum hani nöd dette welle schlafe). Sie isch scho hellwach gsi und total nervös. Mier hend no en Kafi trunke und sie hed gfunde ich söll doch öppis esse aber mier isch bim Ablick vo dem Zopf halbe übel worde, dasi nüt abebracht ha. Und scho isch halbi 8i gsi und mier hend müesse los zum Coiffeur. 
De simmer usem Auto usgstiege, hend eusi TZ begrüesst und ich bi vorgloffe richtig Kapelle. Min GG hinnedri und staht mer voooooll uf s Schleppe *schhhrrrrrrrzzzzzz* e voilà, en riiiiiiiese Riss unne am Chleid. Das hed eusi Nervosität natürlich au ned grad gschmäleret aber guet.
Während allne Lieder hend mich d Emotione wieder voll packt. S Ja Wort hemmer luut und dütlich gsproche und scho isch de ganzi Spuk verbii gsi. Alli Gäst hend vor de Kapelle uf eus gwartet und hend eus en wunderschöne Empfang mit de WeddingBubbles bereitet (wo übrigens kei Flecke hinterlah hend!). Nachdem mier e Huufe Gratulatione entgegegno hend, sind mier als erst losgfahre und hend d Kolonne richtig Apero agfüehrt. Vom Apero han ich leider echt nur mega wenig mitbecho, jede hed welle cho gratuliere und Bilder mache 
so e lustigi Idee..) Und für de Photobooth händs e super Idee gha.. Und das au die anderne voll mitgmacht händ, sindi Family, Mamis, Cousine, mega kuuhl :) Isch dämfall din Papi glich au cho?