nicht registriert

layonie:

---

@toluwu die hab ich selbst entworfen und die kleinen Details dann von einem befreundeten Grafiker einsetzen lassen!

@layonie: Das glaube ich dir, geht mir dann sicher nicht anders - aber soll ja auch so sein! Ist ja alles andere als einfach ein Tag!

toluwu du darfsch die Idee also scho übernäh und chl abluege

Hallihallo!

Ich meld mich churz als frisch verhürateti Frau Mir händ am Friitig en wunderschöne Tag gha! S' Wetter hät gstumme, die zivili Trauig isch en Traum gsi und s' Fäscht am Abig isch top gsi!

Schlichtweg än perfekte 1. Hochziitsteil!!!!

En detailierte Bricht mit Fotene schrieb ich i dä nächste Täg!

Liebe Gruess

Zvile Trauung

Am Friitig 27.4 händ mir eus bi schönstem Wetter s`erst mal s`JA-Wort gäh! Mir händ en wunderschöne Tag mit eusere Familie und Fründe erlebt.

Nachdem mir am Dunnstig Abig alles fürs Fäscht nach em Zivile igrichtet händ, sind mir no vom GG sinere Familie mitme BBQ verwöhnt worde. Mir händ dä Abig i volle Züge chöne gnüsse und sini Eltere händ u dä Plausch gha, dass mir euse letschti, ledigi Abig mit ihne verbringet.

Nachere Nacht mit viel Schlaf (han mich selber gwunderet) simer am Friitig gmüetlich ufgstande und händ no es paar Sache erledigt. Am 11i han ich endlich zum Coiffeur chöne und GG isch sini Harley go wäsche. Er hät unbedingt Fotene mit sinere Maschine welle mache. Ach ja, vo wege Harley. I eusere Regionalziitig häts no es Inserat gha, dass ich jetzt mim GG si`s Liebste bin und er drum sini Harley verchaufe tuet….. hahahaha…. Händ also es paar Lüüt aglütet. Leider wüssed mir hüt nanig wer das gschriebe hät…. Wird sicher am Hochziit aber scho ufglöst.

Bim Coiffeur han ich mich namal richtig chöne entspanne und ich bin begeisteret gsi vo dä Frisur und dä Schminki. Als grossi USA, Western und Countryfans händ mir au i dem Stil zivil ghürate. Frisur hät passt und ich han übers ganze Gsicht gstrahled. Wo GG mich so gseh hät, hät er nur es WOW… usebracht. S`erste Ziil erreicht
Ich han gwüsst, ich muess mis Styling mit dä Frisur usehole. Han ja wegem schnellwachsende Buch notfallmässig es neus Chleid müesse go poschte und ich bin nöd so zfriede gsi. Trotzdem bin ich am Schluss mitem Endresultat glücklich zum Standesamt gfahre. GG hät eifach traumhaft usgseh i sim Westerngehrock und em Huet.

Trauig im Chreis vo eusere Familie und TZ isch wunderschön gsi. Da mir d`Standesbeamtin persönlich kennend, hät sie die ganz Trauig sehr persönlich gstaltet. Ich han sogar recht viel vo dem was sie verzellt hät chöne bhalte. GG isch uu nervös gsi, sini Hand hät i minere immer wieder zittered.
Ich han däfür pflotschnassi Händ gha, han bim unterschriebe zersch mal müesse mini Händ tröchne.
s' Unterschriebe hät den au en Lacher mit sich bracht. Ich han die neu Unterschrift ersch es paar Tag vorher güebt und dänn a dem Tag kei Ziit meh gha zum sie namal aluege. Han drum eifach die güebti Unterschrift usgschnitte und als Spickzettel mitgno. Wo ich dänn dä Spickzettel us dä Täsche gno han, händ alle mega müesse lache. Tja… suscht het ich vergesse wie sie gaht.

Ja und erstunlicherwiis händ mir während dä Trauig beidi gar nöd müesse brüelle. Händ denkt eus übernimmts sicher…. Aber wo mir ufgstande sind und eus umtrüllt händ, isch es passiert gsi. Alli (!!!) eusi Liebste händ Träne i dä Auge gha oder sogar gschluchzet. Ja da händ au mir nüm andersch chöne. Isch aber uu schön gsi (han en churze Moment a dich Prinzessin müesse denke)

Nach em Standesamt händ mir dänn bi mini Schwiegereltere en Apero gha, händ nochli gfötelet und sind dänn gäg dä Abig in Fäschtruum züglet. Es sind öpä 80 Lüüt verbi cho und händ eus Gschenkli und die beschte Wünsch überreicht. Es isch würklich es tolls Fäscht gsi! Eusi Liebste und Bekannte händ sich so viel Müeh gäh bi dä Gschenkli und es sind au Lüüt cho wo mir nie dänkt hetet.
Am 2 i dä Nacht han ich den die letschte 5 wo no ghöcklet sind usegrüehrt und mir händ endlich chöne hei is Bett. Dihei acho, isch euse Stubetisch mitme riise Brunch deckt gsi und im Schlafzimmer häts no es Bettmümpfeli gha! Mir händ eus riisig gfreut. Total müed, aber überglücklich sind mir dänn is Bett gheit!!

Ich glaube mir chömed hüt no Föteli über, wirde sicher no es paar da ine zeige

Liebe Layonie

Dankä vielmal für din Bricht, das tönt nach me super schöne Zivil Hochziit! Ich wünsche eu alles gueti!

hehe, mir ischs mit dä nassä Händ au so gangä.

Wedding Date: 19.05.2012