Hallo! Eusi Flittis sind en Traum!
Leider isch s' WiFi recht langsam, chan drum no nüt ufelade! Mir händ HZ Fotene übercho und sie sind en Traum!!!
Ich schicke eu liebi Grüess us Mauritius!

Mir sind wieder zrug vo dä Flitterwuche und ich han eu ja no min Bricht versproche. Ich han ihn vor dä Ferie detailiert für mich gschriebe. Han en welle für eu chürze, aber han irgendwie kei Ziit. Ich stell en jetzt so ine. Isch hald chli viel Texst....

Ich verwache, es isch 02:30 Uhr und es regnet in Ströme. Mini Gedanke fanget a chreise, ich chan lang nüm ischlafe, ich freu mich trotz em Rege so wahnsinnig uf dä Tag. Wie wird min GG wohl usgseh…. Es isch 6i – ich bin glich wieder igschlafe. Au mini TZ isch wach und so mached mir eus uf dä Weg zum Coiffeur.
Eigentlich bin ich immer no recht ruhig. Geduldig lass ich mich schminke und frisiere. Irgendwenn chunt no eusi Tätschmeisterin verbi und bringt Brötli. Esse mag ich grad nöd. Mini Frisur nimmt langsam Form a und es gseht toll us. Leider isch aber au scho halbi 10i wo mir fertig sind. Jetzt müemer aber Gas gäh… läck und es regnet immer no…

Chum simer dihei hüpf ich is Chleid. Jetzt bin ich aber doch chli nervös. Mir händ es biz verspötig und vorallem mach ich mir Sorge um mis Chleid. Wie söll ich einigermasse suber zum Treffe cho bi dem Schiffwetter????
Egal, han gar kei Ziit zum studiere… Ab is Auto und ab gahts zum Schloss. 5min spöter (mit 5min verspötig und mitem Chleid nöd ganz perfekt gschnürrt) fahred mir vor. Ich risse sofort mis Chleid vors Gsicht, da GG und TZ doch frisch fröhlich ufem Platz usestönd. Guet, au sie händ dänn gmerkt, dass viellicht söttet ine gah und det uf mich warte. Mis Herz schlaht mir bis zum Hals. Bini bis jetzt erstundlich ruhig gsi, isch es jetzt umso schlimmer. Ich laufe zur Tür und chas chum erwarte bi mim GG z`si. Im Schlossruum staht ä alti Kutsche, en Cherzeständer voller Cherze brennt und i dä mitti wartet er.
Wow… ich han am ganze Körper zittered. Min Liebste hebed sich plötzlich anere Süüle fescht und macht riesegrossi Auge. Mir händ nur no Auge fürenand. Er nimmt mich in Arm, ich zittere wiiter wie Espelaub. Min GG seit mir immer wieder wie schön das ich usgseh. Ich muess den glich witzle und frage: "Trotz Schleier??" (er hät immer gseit Schleier segi blöd)
Mir gnüssed dä churzi Moment wo's nur eus zwei git und dänn gahts scho los mitem Shooting.
Fiona (Fotografin) knippst wie wild i verschiedenste Positione. Es fallt eus nöd schwer ihrne Awiisige z'folge. Strahle tüend mir sowieso und anderst als verliebt luege gaht gar nöd.
Leider chönd mir wegem Rege nur dine Fötele, drum gahts au nöd so lang. Mir hoffed aber no uf Wetterbesserig damit mir spöter dusse no es paar Föteli chönd mache.

Ach ja, hani ganz vergesse…. Min Brutstruss…. Han also grad chli Auge gmacht…. Leider nöd vor Freud, nei… er hät mir dänn gar nöd gfalle. Komischerwiis isch's mir aber i dem schöne Moment im Schloss obe egal gsi. Jetzt im Nachhinein find ich sogar er gseht no schön us uf dä Fotene.
Nachem Shooting händ mir bi eus dihei no öpis chlises gässä und dänn isch scho gli Ziit gsi zum i Chile gah.

Es isch churz vor dä 1, ich kontrollier namal alli eusi Feischter. (Die müend nämlich zue si, damit's eus d' Wohnig nöd chönd verunstalt) So, jetzt aber los. Ufem Weg i Chile (mir wohnet grad näbädra) fangts wieder a Tröpfle, aber ich hans nöd mal gross gmerkt. Min Papi, mis Grosi und dä Pfarrer wartet uf mich. S`Grosi isch scho am brüelle wo ich chume. Dä Pfarrer git mir no es paar Instuktione und ich überreiche mim Papi das bestickte Nastuech. Er isch also au recht nervös gsi.
Mis Chleid wird no püschelet und scho ghör ich dä Hochziitsmarsch. Namal dureschnufe und los gahts. Langsam laufe!!!! Alli Lüüt stönd und GG wartet di vorne uf mich. Was für en Moment. Chile isch gstosse voll und ich ghör immer wieder wie Lüüt mir zueflüstered: "du gsehsch so schön us…" Mini Nervösität isch weg und ich chan dä Gottesdienst sogar gnüsse.
Da mir dä Pfarrer sit Jahre kennend, isch Trauig sehr persönlich. Ich muess sogar wieder einisch meh ghöre, was für än Schlingel ich doch gsi bin i dä Schuelziit.
Churz vorem Eheverspreche es brumme vor dä Chile. GG und ich lueged eus a und strahled. Das muess dä Harleytöffclub si. Au dä Pfarrer meint dänn zmitzt i dä Predigt:" das sind wohl Töff, die müend jetzt nachli warte!"
Jetzt chunt s`Eheverspreche. Eimal räuspere bitte, dass dänn das Ja au klar usechunt. Mis Gottemeitli bringt ganz stolz dä Ring, gfolgt vom Kuss und aschlüssend ä chlini (oder grossi) Überraschig für mich. GG sitzt as Piano und singt für mich s'Lied "An deiner Seite".

Mir chönds chum glaube was sie alles für eus mached. Es sind scho so viel emotionali, luschtigi, rüehrendi Moment gsi. Es isch fascht nüme z`toppe.

Endlich laht jetzt au Musik los. Zipfi Zapfi fanged a iheize und scho bim 2. Lied startet ä Bolognese wo nüme wett höre. Alli (!!) wo chönd mached mit. Das sind also ca 70 Lüüt wo im Saal umehüpfed. Eifach toll. Unedure, zwüsched dure. Stimmig isch gigantisch.
Ah ja, natrülch händ mir ja no tanzed. Euse Hochziitstanz. Mir chund grad in Sinn, ich weiss gar nöd zu wellem Lied. GG hät plötzlich en Hänger gha. Hät ufem falsche Bei dä Walzer agfange und hät denn au no uf di falsch Siite welle dreihe. Also stopp und namal afange. En Schirm i dä Hand und voller Fasnachtsschlange "schwebet" oder tramplet mir übers Parkett.

Die Stimmig isch unglaublich. Alle vo Jung bis Alt tanzed, klatsched und sind fröhlich. Het ich nie dänkt. Han doch immer Angst gha, dass d^Lüt nöd tanzed und d`Stimmig träg chönti werde. Die Sorge sind ganz umesuscht gsi.
Dessertbuffed wird eröffnet und alli sind vom ganze Esse begeistered.
Ich bin eifach nume glücklich und zfriede. Kei Spur vo Müedigkeit oder SS Beschwerde.

Am 3 isch dänn aber glich fertig. Die letschti Rundi wird akündigt und ich merke plötzlich, dass dä Tag doch lang gsi isch. Im Shuttle hei würdet mir am liebste Ziit ahalte. Die Emotione für ewig fescht halte.
Mir ahned, dass mir so schnell aber nanig is Bett chönd. Au wenn Guggemusig nöd is Huus hät chöne (oder sinds viellicht glich irgendwie inecho) werdets sicher öpis gmacht ha.
Und so isches. Mir fahred mitem Bus vor und ich gseh scho die ersti Maskeballtafle. Soso…dä Maskeball findet das Jahr bi eus statt. Euse Balkonufgang isch mit Schnürr zugschnürrt, überall häts Fasnachtschlange und Ballön. Zum Glück hät GG immer es Sackmesser däbi. Somit isch es nöd so schwer mal d`Stägä ufezcho. Dobe wird’s dänn heikler. Am Bode sind Becher mit Wasser gfüllt, Ballön bis zum Gländer drübergleit und alles mit Chlebeband verchlebet. Tja… irgendwie müend mir da dure. Am halbi 4i am Morge chlöpfed Ballön, Wasser lauft über dä Balkon abe. Ich hoffe eusi Nachbere verzeihed eus dä Lärm. Überem Balkon hanged es riise Banner mit Just Married und eusne Näme.
irgendwie händ mirs i d' Wohnig gschafft. Was für ä Erliechterig – sie sind nöd ine cho. Sie sind aber mit dä Leitere no uf dä hinderi Balkon und händ det no Deko ufghänkt. Irgendwie händ mir eus also glich gfreut händs öpis gmacht.
Für GG isch aber nanig fertig mit schaffe. ER muess no mis Chleid ufschnürre und all die Spängeli müend usem Haar gno werde.
Am 5i falled mir totmüed, aber voller schöne Erinnerige is Bett. Was für en Tag. Schöner, besser, emotionaler als ich mir das je vorgstellt han.

Zuletzt bearbeitet am 29.05.12 21:04

WOW Layonie, danke für den tollen Bericht! Super wie du deine Emotionen und Gefühle in Worte fassen konntest, hab gerade richtig mitgebibbert

Freu mich mega für euch und wünsche euch alles erdenklich Gute für die gemeinsame Zukunft! Und natürlich bin ich gespannt auf Fotos

LG Joy

02.06.2012 - dem Paradies ganz nah...