| Mona's Züriseehochziit :-) |
|
|
1 .. 8 9 10 11 12 .. 16
|
|
|
|
|
|
|
|
|
|
|
15.06.13 10:51
Kamala 
|
Re: Mona's Züriseehochziit :-)
Mona gaaaanz en schöne Tag!!
Muess di ganz ziit a dich dänke und werde au nervös
Gnüss din Tag i volle züüg met dem tolle Wätter!
|
|
|
|
|
|
21.06.13 14:47
Mona83
|
Re: Mona's Züriseehochziit :-)
Soo jetzt hanis äntli gschaft. 
Also mitlerwilä isches au scho wieder fast ä Wuchä här sit äm grossä Tag. Ich chan eu nur eis sägä, mä händs traumhaft gha, super Wätter, super Gest und di bestä Trauzügä. 
Eis nachem andere:
Also mini Schwöster hät mich dähäi am halbi 9i gholt und zu dä Trauzügin gfahre, diä isch allerdings bim Coiffeur gsi und hät mer eifach s Hus zur verfüägig gstellt. Mini Stylistin isch au scho det gsi und so hämmer grad scho mal los gleit. Ich han d Nacht vorher super guät gschlafe, ca. 7 Stund. Also bini topfit gsi und hans eigentli chum chönä erwarte bis mini Trauzügin retour chunt will d Stylistin isch ä liäbi gsi aber han diä doch nöd guät sooo chönä z todschnorre wiä mini TZ. 
Sie isch dän öpä am 10ni cho mit Hugo-Champagner, Chips und Pasta und Tomatesauce wo mer spöter gmacht händ. Öpä am 11i bini fertig gsi und mir händ dän voll easy Pasta kochet, dussä uf de Terrasse gässe, nacher üs langsam agleit und ca. am 5vor 1 usem Hus gloffä will mer am 1 Shooting gha händ. Het alles passt…. Ja d Betonig isch uf HET
Di erst Pannä isch nämli scho cho wo mer usem Hus gloffä sind, dä TZ ihres Chleid isch nach öpä zwei Meter scho kaputt gangä. S hät ihre de Rissverschluss butzt wo uf dä uf de linke Sitä unter dä Arme bis abe unter dä Arsch gangä isch!!!!!! Mä händ au kei Chancä gha dä irgendwiä fest z machä. Also häts nüt anders gäh als ihre Chleiderschrank dursuächä und schlussäntli hämer äs schwarzes churzes Chleidli gfunde und sind mit ärä verspötig vo 10-15 min. am Träffpunkt acho.  mir händ üs eifach gseit das isch jetzt di einzig Panne und diä hämmer scho durä.
D Fründin vom Trauzüg hät dän bim Schloss undä gwartet mit mim Brutstruss und äm armbändeli vo dä Trauzügin.
Nacher simmer ufä gloffä und det hät min Schatz mitem Ruggä zu üs müäsä warte, ich bin ufä gloffä und dän häter sich dörfe umdreiä. Är hät meeega freud gha und isch chli baff gsi. Mir isches aber au ähnlich gangä. Mit dä sunnä hät sis wissä Hämp unter äm Azug so schön glüchtet (wiä mis Chleid au) und är hät mer so richtig gfallä. 
Dän hämmer bis öpe am halbi 3 Shooting gha und dän ä churzi Pausä. Bin zu dem Ziitpunkt immerno nöd nervös gsi sondern han eis Chäferfäst gha mit de Fotografin. Min Schatz isch scho mal zu de Gest (hät mich chli gnervt dasi mi han müäsä versteckä und är zu dä Llüt hät chönä go Sali säge. ).
Aber dänn sind mini Bridesmaids sind cho und händ all so super härzig usgseh. Sind all bim Coiffeur gsi und händ cooli Frisurä gha, jedi öpis anders wo zunärä passt hät. Hammer!!!
So öpe ä Minute vorem inelaufä häts agfange bi mir, bin mega nervös wordä und han angst gha ich chäm nöd inä. Bim imelaufä hani mi aber dän rächt guät ghaltä, han ja eigentli Angst gha dasi stolpere oder so. Grad am Schluss bevor mer fast bi mim Schatz gsi sind isch min Däd mir no churz ufs Chleid gstande aber s händ nöd mal all Lüt gmerkt. D chile sälber isch rächt locker gsi, super gmacht und gar nöd zuu viel chiläzügs. D Sängerin isch natürli au super gsi.
Und üsi Kollegä händ d Fürbittä gläse, mega härzig, sogar d Jungs.
Nach de Chilä simmer grad richitg Aperolocation gstüred und sind erst det still gstandä für Gratulatione damit diä Lüt wo durst händ, au scho mal öpis chöntet go näh. Genau dänn häts ganz churz tröpflet und so sind d Gratulationä schnäll verbi gangä. 
Nacher wo mer am Apero ort gsi sind isch s schönst Wätter gsi. Für mich fast chli heiss will ich i mim chleid so gschwitz han aber egal. Han dä Apero so richtig chönä gnüssä und mich häts au dunkt ich han gnuäg ziit gha für all. Han versuächt meh mit de Aperogest z redä anstatt mit dä gladnä. Dän isch scho di erst Überraschig cho, mir händ violletti Ballön stigä lah und jedä hät öpis müäsä drufschribe was er üs schänkt wän dä Ballon gfunde wird.
s hät aber vorallem hammer usgseh wiä all diä viollette Ballön glichziitig id luft sind. Nacher hämmer ganz easy chli Gruppäfötelis gmacht, aber voll kei stress so wiä a andernä Hochziitä. Hät mer gfallä, mir händs au rächt lustig gha det.
Wos dän richtig Abiglocation mitem Bus gangä wär häts gheissä mir fahred mit ämä andere Gfährt uf Pfäffike, dä Kollegin ihre Fründ und sie händ ebä äs alts VW Büssli umbauä und üs mit dem gfahre. Inklusive Salzstängeli, Champagner und Autoschmuck. Ihre Schatz isch sogar extra in Bluämälade gfahre wo mer üsi Bluämä bstellt händ wo dä dekoriärä. Dä hät eifach hammer usgseh. 
Mir händ dän no chli gwartet damit d Gest vor üs det sind und üs empfange chönd. S hät voll gfägt dur Rappi dure fahre mit dem Büssli und wo mer acho sind hämer glaub beid mega usem büssli usägstrahled s hät dän au no paar cooli poser Föteli gäh mitem Büssli.
|
|
|
|
21.06.13 14:51
Mona83
|
Re: Mona's Züriseehochziit :-)
Nacher simmer ine und händ de Welcomedrink gna. Dän häts ganau wo mer all schön dinä gsi sind afange abälähre wiä blöd. mir händ nur gschmunzlet. Nach öpe 5 min isch aber wieder schön gsi und mir händ di schön Abigstimmig richtig Züri chöne gnüsse
Nacher isch das cho wo ich am meiste freud gha han: HAN E HAMMER HOCHZIITSZITIG ÜBERCHO!!!! Würkli nöd eifach nur so wiä ichs känä, äs isch äs Meisterwärk gsi. Das händ zwei ganz guäti Fründine vo mir gmacht, hät mer natürli bsunders Freud gmacht z wüssä dass nöd alles mini Trauzügin hät müäsä machä.
Han d Ziitig chli duregschneugged aber han gnau gwüsst, wiä mit de Chärtli, dasi das mal in aller Ruä wet durä läse.
Dän di nächst Überraschig, uf jedem Tisch sind so Einwegkameras gläge und all händ wiä chlini Chind so dööfi fotis gmacht.
Ich han dän unbedingt welä üsi Suite go aluägä bevors los gaht, hät mi also grausam wunder gnah. Bin zerst mit äm Schatz ufe und spöter mit allnä Mädels. Läck händ mir gackeret uf därä Suite und Scheiss gmacht ufem Balkon. insgesammt bini fast dä ganz Abig immer wieder abghaue mit öpertem und go d Suite zeigä. isch immer mega lustig gsi.
Dän isch no ä meeeega schöni und nöd langwiligi, eher lustigi und liäblichi Red vo mim Däd cho. Han gar nöd gwüsst dass är das so guät chan. Eifach mega hammer!!!!
Tja und dän hämmer gässe und nachem erstä Gang isch es witer gangä mit Föteli vo ihm und vo mir als chind. Äs isch ä super Präsentation gsi wo min Götti gstalltet hät und mini Trauzügin präsentiärt hät. Dän dä nächst Gang und dän isches irgendwiä losgangä mit so ämä lustigä Chlüperlispieli. Äs sind vier chlüpperli umä gangä und jedä hät immer müäsä luägä daser keis hät und öpert anderem gäh. Am 12i isches dän fertig gsi und diä wo no eis dra gha händ, händ öpis für üs müäsä machä (zopf bringe, üs zum Kafi ilade etc.).
Dän isch öpe dä Hauptgang cho und nacher häts no meh Spieli gäh. Zum Bispil händ drü Päärli (unter anderem au mir) müäsä füre Ruggä a Rugge sitzä und so Frage beantworte. Wär wäscht meh ab etc…! das isch lustig gsi, natürli vorallem darum will ich und min Schatz üs niä einig gsi sind und di andere Päärli scho.
Dän häts uf eimal gheissä mä gechet no usä, sind dän go Himmelslaternä flügä lah. Nöd eifach nur di chlinä, nei riiiieä Möbel. ich säg eu das isch sooo geil gsi. All händ än wissä gha und mir zwei än rotä. Ich han dänkt ich spinne, sooo viel Überraschigä irgendwänn isch doch no färtig. Ich meinä Ballon flügä lah UND Himmelslaternä, das isch ja dä hammer!!!!
Nacher simmer inä und dinä scho di nächst überraschig, mir händ es Memorie übercho, vo jedem äs Föteli als Chind und es aktuells. Hui isch no schwierig zum lösä und teilwis meeega lustig. 
Det hani dänkt, so jetzt hämmer gschänkli übercho, überraschige bis det und äne use gha, jetzt düämer no chli gügälä und tanzä. Ah ja und Dessert ässe!
Det isch natürli no dä Gipfel vom Nussgipfel cho:
wiä ihr sicher wüssed hani gseit s git bi üs kei Turtä, mä händ ja es Dessertbüffet mit jenstä verschiedene Dessert gha. Dä Trauzüg hät gfunde das gäch gar nöd und hät grad sälber ä Turtä gmacht. Nur scho woni das ghört han hani gmeint ich spinne. Än Maaa wo am Fritig Abig bis znacht am 12i no Turte bachet. Wow
Und woni sie gseh han hani än riiiiese Schrei ablah. Är hät äs isfäld gmacht und idä mitti än überdimensionale Puck gmacht (Schwarzwälderturtä) mit äm ZSC-Logo obä druf. Unglaublich!!¨
Sie isch au mega fein gsi hät nöd nur guät usgseh. Han aber allgemein nöd viel dessert mögä. Bin det scho rächt vollä gsi und i därä Hitz isch mer nöd so nach süässem gsi.
Dän isch no dä Hochziitstanz cho, und sust isch no chli tanzed wordä. Mir mädels händ natürli „the wonder“,“ maccarena“ und all das züg müäsä durä gäh. S hät sogar ä bollognese mit allnä gest gäh. Hihi ich vora mitem dräckige Chleidzipfel idä Hand!!!!
Wo mer am 2 usem Rum händ „müäsä“ sind di einä go schlafä (aber nur wenigi) und dä Rrest isch no is Casino. Hihi säb isch lustig gsi, han irgenwiä vergässe wasi für es Chleid ahan und han mi immer gwunderet warum all so nett sind und mich all so aluägät. 
Spiele hani nömä mögä, han das di andere mache lah und han gmüätlich ade Bar chli Hugos trunke
Wo mer dän am morgä am 4i richtig Hotelsuite gangä sind hät üs diä Frau am Igang vom Casino no ä Fläsche Champagner gäh will sie so freud a üs gha hät.
Mir händ sie aber nömä möge trinke sondern händ nur mal us üsnä verschwitztä Chleider welä und ab unter di chalt Duschi.  Am nächste Morgä simmer sogar di erstä gsi am Morgätisch und händ sehnlichst gwartet bis üsi liäbstä Gest chömet und mir witerfiirä chönd. Sind dän au di meiste no bis öpä am 1 det blibä (sind no uf d Terasse go käfele wils so schön gsi isch). Nacher simmer nur rasch hei go s Züg ablade, an See go bädele und am Abig hämer uf dä Terrasse all Briäfä gläse, d Ziitig gläsä und s Gäld zehlt.
|
|
|
|
|
|
|
|
|
|
1 .. 8 9 10 11 12 .. 16
|
Anmelden
