Unseri Ziviltrauuig isch sit gli 3 wuche scho vrbi, und es goht au nur no 3 wuche bis zum groooosse dag!
bi leider erst ez drzue ko e bricht schriebe :)

Ziviltrauung 21.6.14

Am obig vorhär bini vonere wuche im graubünde heimko und bi völlig kaputt gsi. mis mami isch au scho am fritig zu uns ko und het zum glück den no d wohnig ufgrumt und putzt und ich ha mi gg no zum ikaufe gschickt, so hani chli zyt ka zum no züg mache und vorbereite.. am schluss bini bis am 112i dra gsi und bi totmied is bett keit.
am 21.6. den am morge het pünktlich am 7ni de wecker glüte, bi kei biz nervös gsi hani gfunde. bi den ufgstande schnäll go dusche und chli mini hoor vorbereitet dases bim coiffeur nüm so lang goht (i ha viiiiiil hoor mit locke und mega volume, ha si chli miesse bändige )
mi gg und mis mami sin am zmorge ässe gsi und i hät eigetli au sölle ässe, aber i ha übrhaupt nid möge. mi schatz het mir sogar es brötli gschmiert aber trotzdäm gar kei lust uf öbis ka, im gegteil mir isch eher schlächt gsi ha scho dänkt mi empfindliche mage mäldet sich. bi den uf die halb 9i zum coiffeur bzw. kosmetik. bi den gschminkt und glichzitig frisiert worde. die hän das soooo super gmacht. bi so entspannt gsi wo i dört usegloffe bi und i ha au no guet usgseh bi den ufem heiwäg mis strüssli go hole und no iis für spötr. zrugg dehei hani den ändlig no mis brötli gässe und langsam het sich au mi mage widr beruhigt. sin wohl doch d närve gsi, obwohl i nie nervosität empfunde ha. mini muettr het mir de gholfe bim azieh und nägel no lackiere und bald druf sin mim maa sini eltere und schwestr ko. am viertel ab 11i simer de los zum zsa gfahre. vom parkplatz us bin ich und gg handin hand allne devo glofe, si hän scho gmeind, mir häns wohl pressant, hihi. hämir au ;) vorem zsa hän scho d trauzüge, ahang und mi vatr gwartet ka. hän no alli hallo gseit und chli pläuderlet und dr gsellschaft wo vor uns dra gsi isch zuegluegt. per zuefall isch das den de brueder vo eim wo mit mir und minere einte tz id schuel isch gange. d wält isch amigs scho klei
am 12i simer den is trauzimmer bätet worde wo zum inelaufe „i love you till the end“ glofe isch. ha leider gar nüm soviil vo däm lied mitbiko, wil mir as letschts inne sin.
mini schwöster isch den näbe mi ghoggt as offizielli tz und i bi langsam aber sicher doch nervös worde. isch e voll komischs gfühl gsi. i und mini schwöstr hän de händli ghebt, si isch glaub au biz nervös gsi. das het de grad guet do ha de nämli gli gmerkt wie sich die erste tränli ind auge dränge, aber mini schwöstr het die widr wäg druggt
jo den het d zsa beamtin uns paar sache vrzellt, aber i ha kei ahnig um wases dört wirkli gange isch. das isch irgendwie bi eim ohr inne und bim andere sofort widr use. vorem ringtusch het si no es gedicht vorgläse, das weissi no, haha so zimli s einzige. und de hani und gg dörfe ufstoh und zu „all of me“ vom john legend hämir den „jo“ gseit. wo si mi gfrogt het, hani d spanig no chli welle erhöhe und ha extra e kurze momänt gwartet und mi gg nomol priefend agluegt hän natürli alli glache. drnoch hän mir no d ring tuscht und den nachere gfühlte ewigkeit het mi ab den offizielli ma mich küsst, es het grad richtig krüüselet im buuch :) s het au meh as nur es „will&kate“ küssli gäh i glaub mir hän beidi gstrahlt. denoch hets nomol es gedicht gäh und den hämir natürli au no untrschriebe. ha mir gaaanz fest gseit: dänk an neu name, und ha den e ganz solidi untrschrift anebrocht. nachem untrschriebe isch den au scho sozsage vrbi gsi und de sin alli ko gratuliere. zerst mini schwöstr und de hani mi nüm könne hebe, ha voll los brielt, mis mami het grad mitgmacht genau so wie mini besti (2.tz) und am tz sini fründin. ei umehüllete isch gsi es git e foti wo ich und mis mami grad voll vrhüllt in kamera luege, de hammer! nachere kleine fotisession simer de langsam gange und d zsa-beamtin seit ich wünsch ihne alles gueti frau xxx, alli hän widr miesse grinse, s erst mol mit neuem name agsproche worde.
vorem zsa het den unsere kleine apero scho uf uns gwartet und mir hän no paar fotis gmacht (de platz dört isch mega schön, so hämir gar niene hi miesse zum no es paar aständigi föteli mache z könne) nacheme zitli hämir den gfunde das mir alli zu uns hei gön und de hämir dört no wiitr gaperölet :D mini schwiegerfamile het sich den mol vrabschidet und mir hän den grilliert, gschnüürlet, wm gluegt, no grad paar sache für am 01.8. besproche usw. mir hän uns das jo au so gmietlig gwünscht und das isch super gsi. uns hets mega pässlet eso, würdes widr genau glich mache!

Zuletzt bearbeitet am 09.07.14 15:49

no paar fotis drzue

due se de aber widr usenäh in e paar täg ;)

Sehr schön und es mega tolls Chleid! Ich han fasch s gliche agha a mim Zivile :) Glückwunsch und alles Gueti!

So en schöne Bricht!! Nomol ganz herzlichi Gratulation :) Bin dänn au ufs chirchliche gspannt, no 21. Täg .
D'Schueh wod agha häsch findi au no mega kuuuhl! Dörfi fräge vo wo die kauft häsch? :)

Ah würkli s'riese Schnäppli!! So guet . Ja dänn gahn ich doch dete au mal no go luege :) Danke für de Tipp! Han mal so wiisi Notfallschueh kauft, falls ich nix meh wür finde..

So jetzt wirds au für mi langsam zyt mi bricht uf "papier" z bringe.
Zerst mol paar facts zum allgemeine vrständnis ^^

Hochzeitstag: 01. August 2014
Freie Trauung und Apero im Hotel Seeburg Luzern
Abendessen und Fest im Hotel Montana in Luzern

Wie e paar vo euch jo scho wüsse bini zimlig nervös gsi drvor. Ich, mini schwöstr & mini zweite brutjungfere sin am donstig zobe scho uf luzärn gfahre und hän im hotel montana d candybar, dr gästebuech/ gschänktisch, wie au d gadtgschänkli (limoncello) ufgstellt. D tischdeko het d floristin inkl unsere super schöne kerzeständer (danke janedoe, lula und nemo - richtigi forums kerzeständer sin das, d delfinchen wird die nägsti si ) und d blueme am nägste morge den ufgstellt ka. Nach däm s montana sowiit parat gsi isch si er de ind seeburg und hän dört unser zimmer bezoge. Zerst hani no es gschänkli biko, e rahme miteme föteli vom polterobig hani scho gwüsst dasi dä bikum, wil mir hän dörtzmols alli mit rotem lippestift de passepartout "küsst". Am 11i hämir de so hunger biko (sogar ich, obwohl ich scho dage lang kuum no öbis gässe ha) das mir schnäll an bhf in mcdonalds gfahre sin. Isch no lustig gsi und e gusti ablänkig. Am 1 am morge simer de is bett, mini zwei zimmergnossine hän zimli schäll gschlofe, i bi mind no bis am 2 wachgläge am nögste morge bini am halb 7i widr wach gsi und mir isch zimli schlächt gsi. Am 7ni hanis de nüm usghalte und ha mi azoge und bi chli am see go spaziere. Mis mami het mir de kurz druf abe gschribe das si im zug untrwägs uf luzärn isch, hanere grad miesse alüte, ha eifach miesse rede, läck so nervös bini gsi. Uf die 8i het mir den mini schwöstr gschribe und gfrogt wo ich sigi bi de zrugg und mir sin go zmorge ässe. Ha natürlig kuum öbis abe brocht den isch de hotel manager zu uns ko und het gseit das s wättr leider unstabil isch und uf e mittag gwitter agseit sin, si hän extra uf klote an flughafe aglütte zum s wättr abkläre, abr eso ischs risiko z gross gsi zum d trauuig dus im seegarte diräkt am see zmache (principessa fühlt sichr grad mit mir) aso hämir d trauuig in seeburgsaal vrlegt. Zum glück isch dä saal au sehr schön gsi und het panaroma fänster mit sicht uf de see ka. Aso hämir agfange dört no de räscht an deko ufstelle. Idr zwüschezyt isch mis mami ko u d au gli druf abe mis styliste team und natürlig au d fotografin (celine mastel, ka si nur empfähle, si machts so super ) ab däm momänt hani langsam könne ahfoh entspanne. De morge isch so schnäll ume gange mit schminke, hoor, allne fraue wo immrwidr ins zimmr ko si usw. Mi maa het den zwüschedure au mit mir gschribe und mir vrsicheret das de dag wunderschön wird, au ohni trauuig duse. Wil wie höts andrsch könne si, es isch nid eimol ko rägne am ganze dag, im gegeteil suune pur am erst august in luzärn!! Tja, mi super maa wo den mittlerwile au i dr seeburg gsi isch het den no sichrgstellt das wenigstens s apero diräkt am see stattfindet abr eis nachem andere, hihi.
I unserem hotel zimmer isch aso ei trubel gsi und ihr wärdets nid glaube, das het mi sooo beruhigt. Bis kurz vor de trauuig isch d nervosität de scho fast vrfloge. Mi vatr isch den zu uns ko während mir mis kleid azoge worde isch, phuu mini arme mädels, i ha soo viil knöpfli am kleid ka, es isch ewigs gange. Aso den bini parat gsi und mir sin los, ich mi vatr, mami, bluememeitli, mini super schwöstr und mini besti. Mis mami isch de as ersts in saal, sozsage as letschte gast wo kunnt. De ringträger het scho uf uns gwartet u d isch zu minere sis an d hand. Zum lied "the story" vo dr brandi carlile simer den iizoge. Zerst mini besti mit em härzigste bluememeitli übrhaupt an dr hand, den mini schwöstr inkl unserem schnuusige ringträger, den ich und mi vatr. Ha mim papi öpe 3mol drvor scho gseit mir mien langsam laufe, scho nur wägem kleid.. Abr dä herr isch natürlig los grennt hanen schli miesse zrugg zieh und de ischs in saal inne gange. I ha irgendwie weder d gäst, no d musik vorgno, ha nur mi gg gsuecht! Die ganze emotione i däm momänt - unbeschriblich! Ändlig bi ihm ah ko het mi vatr mich de übrgäh und i und mi maa hän uns nur no agstrahlt. I ha nid andrsch könne as ihn küsse, hihi! Är het au tränli ide auge ka so e schöne momänt. Den wo mir aneghoggt si hani s erstmol unseri gäst gseh ka,hihi. D trauuig isch glaub sehr schön gsi und halt au persönlig, dos jo e freii trauuig durch e zeremonieleiterin gleitet gsi isch. S schönste hani gfunde wo mini schwöstr und am gg si trauzüg zäme vrzellt hän wie mir uns kenne glernt hän, si hän das so toll gmacht ka bi so stolz uf die 2 gsi. Unseri sängerin, e kollegin, het soooo hammer schön gsunge, isch so schön gsi zum loose und gniesse. Hön au nur feedback übr ihri tolli stimm kriegt ka. Mini eltere und schwöstr sin während dr trauuig non stop am brielle gsi, imr wenni zu ihne gluegt ha, sin au grad tränli gflosse den ischs ändlig sowiit gsi, s ehevrspräche und ringtusch.