Eg wünsche euch morn e wunderschöne Tag und es tolls Hochzit. Gniesset der Tag i volle Züg. Es wird bestimmt traumhaft wärde. Drücke der Dume dass d'Sunne trotz de Wettervorhersag duet schiine. Für euch wird sie sowieso schiine!
Hochziitsbricht vo de Nemo Liebi Mitbrütlis und alli wo suscht no mitläsed: ICH BIN GHÜRATE!!! Eis scho mal vorweg: Ich han es wunderschöns, unvegässlichs und traumhafts Hochziit dörfe erläbe mitere Aschlüssende hammermässige Party, wo so richtig nach mim Gusto gsie isch!!   Aber fangemer mal vo vorne a…. Ich han ja am Frietig scho im Hotel pfused mit minere TZ. Au scho dehte sind eusi Fründe us Köln gsie. Mir sind denn no mit allne go Znachtesse und händ en mega gmüetliche Abig gha. Min Ma isch denn so nach de zäne heigfahre und mir drü mädels (TZ, d’Ffründin usem Dütsche und ich) händ denn no en witzige Abig mit viel Caipi und Margherita verbracht, bis mer denn am 00.30 totmüed is Bett gheit sind. Am Samstig morge isches denn los gange. Dusse no einigermasse schöns Wetter. Einigi vo eu händ ja mitübercho, dass mir de Plan no churzfrsitig umgstellt händ, da ja s’Wetter no bis am Mittag guet agseit gsie isch und nacher nüme…. Mir händ eus denn entschiede, dass mir scho am Mittag vor de Trauig gönd go shoote, damit mer zwei Chance händ wos troche chönti sie und dass mer au bitz meh Bilder chönd mache…. Am morge am nüni isches losgange. Ich bin zersch dur mini Fründin, wo Make-up Artist isch, gschminkt worde und denn hät mer de Kolleg d’Haar gmacht. Ich han mega bibbered a dem Morge…han eifach nur no use welä und paar Bilder im trochne schüsse… Am 11.45 bini denn fertig agleit und ready gsie. Huuuiiii bin ich ufgregt gsie. Dehte sind s’erste Mal trändli gloffe… ich han mich so versuecht zäme zrisse, aber woni mi ferig parat im Spiegel gseh han, denn häts mi eifach überfalle…. Und mis Mami hät au grad mit briäged. Mini TZ hät denn mim Ma gseit er müessi abe und vorem Hauptigang vom Hotel warte. Denn bin ich d’Stäge abecho und han ihn s’erste Mal gseh. Huuuiiii isch das schön gsie  Und s’erste wo er zu mir seit: Du gsehsch toll us, so es schöns Chleid! Huuuuiiii, ich bin so glücklich gsie. Er isch immer mega kritisch gsie wenn um Hochziitschleider gaht…. Mir sind denn is schön gschmückte Auto ghüpft vo mim Papi und genau denn häts agfange regne…BINGO! Also nüt mit Fotene im trochne… Eusi Fotografe sind denn au losgfahre. Dobe acho häts immer meh gregnet… Läk hät eus das möge. Ja nu, ich has irgendwie easy gno und denkt: Chum schiess druff, denn gömmer chli ine und mached dehte Bilder…. Uf all Fäll hämmer denn bim Schloss obe no ganz tolli Bilder chöne mache. Es hät denn nöd so Fest gregnet. Mir sind under de grosse Bäum fast im trochne gsie. Mir händ denn sooooo tolli Bilder under dene Bäum chöne mache, dass mir eus immer wieder aglueged händ und gseit händ: Es isch die einzig richtig Entscheidig gsie, das Shooting scho vorher mache. Irgendwenn häts denn so richtig agfange abelähre, dass mir denn is Schloss inegflüchtet sind. Eusi Fotografe händ eus denn im Schlossmusem eifach ade Zahlstell verbie gschlüsed und denn hämmer i dem alte Barock-Museum chöne Bilder schüsse. Die Bilder sind bestimmt en Traum worde, ich freu mi scho so uf die Bilder. Min Brüeder isch denn di ganz Ziit debi gsie und hät Schirm und Requisite ghebet usw. Am zwei simmer denn fertig gsie und min Ma und min Brüedsch sind richtig Rittersaal übere. Zu mir isch denn min Papi cho, wo dehte mit mir gwartet hät. Mir sind die zä Minute vor cho wie e Stund…. Mim Papi isch denn no halbe s’Blüemli abgheit vom Azug und denn hani ihm das nachem übere renne zum Rittersaal nomal richtig agsteckt… Ich han ihm das Ding so inegrammt, dass es ihm id Brust gstoche hät und er denn grad en Bluetfläcke ufem Hemd gha hät…Läck händ mir glached!!! Zum Glück hät er de Azug ja no agha, so häter denn nacher im Hotel chöne go s’Hemd wechsle   Er hät mich denn zum Forest Gump Piano Theme inebegleitet. Min Papi isch sooooo nervös gsie, mega herzig. Er hat mich denn gfröged, isch das euse Isatz, mueni jetzt laufe?? So süess… Er hät mich denn dur de Gang vo eusne Gäst begleitet. Wo mir inecho sind, händ sich all vo ihrne Stüehl erhobe und ich han nume realisiert wie alli WOW säged und wie min Ma vorne staht und Träne ide Auge hät… Er isch mega berührt gsie, obwohl er mich ja vorher scho gseh gha hät. Ich han ihm denn en Schmatz gä und denn hämmer losgleit.  Nachere mega herzige Red vode Standesbeamtin über euses Kennelerne und Gedicht über Puzzel usw, händ mir denn d’Ufforderig übercho, eus s’Ja-Wort zgä. Das hämmer denn au lut und dütlich gmach und denn händ eusi beide Neffe d’Ring füre bracht. Mir händ so glached, es isch eifach Zucker gsie. De grösser hät de chliner imene Holzwägeli füregstosse. De chli hät euses Ringchüssi die Händ gha, das isch soooooo herzig gsie. De chliner isch ebe ersch jährig und chan noni laufe und er hät nöd wel allei für echo, das händ mir aber nöd gwüsst, dass sie s’zweite chömed. Zu Yiruma River flows in you sind sie denn zäme füre gwägeled. Mir händ eus d’Ring agsteck, isch bitz es chnorz gsie vor luter ufregig, und denn häts no es Gedichtli gä und paar Wort vo eusem Tätschmeister. Nach 35 Minute isch Trauig dure gsie und mir händ ei
eigentlich ja vor gha als letschts usezlaufe und dass Gäst eus mitemene Spalier und de Weddingbubbels empfanged…. Tja, leider häts immerno grad abegregnet dusse. Eus TM händ denn das churzerhand so gmacht, dass d’Lüt i euse Gang gstande sind und mit de Händ so e OLA gmacht händ. Das isch au toll gsie. Mir händ denn als ersts grad es Glas Prosecco vom Chef vom Ochse id Hand druckt übercho und händ denn agstosse zäme. Denn hämmer alli Gratulatione entgege gno. Phuuu, das sind einigi gsie. Aber total herzig! Plötzlich seit mini TZ alli use, es hät ufghört regne!!!! Juhuuuuu!!! Mir händ denn churz müesse dinne biebe und sie händ Türe zue gmacht. Nach 2 Minute isch Türe ufgange und ali sind bewaffnet mit Weddingbubbels und rote und wiesse Herzluftballön im Spalier gstande!!! Das isch wunderschön gsie! Han soooo freud gha, dass mer das denn gliech no händ chöne mache!! Mir sind denn de Spalier zwei Mal ufe und abe gloffe und zwei mal grennt! D’Lüt händ eus immer dezue agführed, eifach genial! Nacher hämmer d’Ballön mit de Chartene stiege glah…wird aber warschindli nüt me zrugg ccho. Es isch überall ja soooo nass gsie und d’Charte sind chum meh läsbar… Ja nu, aber es hät uu Spass gmacht. Nach de Ballön hani de Wurfstruss gschosse. Sie händ richtig drum kämpft, so witzig!! Bald mal isch denn foifi gsie und eusi Gäst händ sich richtig Hotel Ochse abe begä. Mir sind denn los a euses zweite Shooting! Ich säge nume WOW! Die Fotografe händ eifach es hammer Aug für die coole Sujets!! Zwüschedure häts immer mal wieder grageled, was eus aber gar nüm gstört hät. Mir händ eifach ta wie wenn nüt wär. Sie händ immer wieder gseit, dass sie no nie so es Päärli gha heged wo so super mit gmacht händ bi so kakk-Wetter. Mis Chlei isch Pflotschnass und schwarz gsie, aber es isch mer so Wurst gsie. Es hät sich sowas vo glohnt dur de Sand und Chies laufe zum a die schöne Plätzli anecho.  Nachem Shooting simmer denn richtig Schlossparkplatz abe. Deht isch denn eusi Vespa Ape parat gstande. Min Ma hät sooooo freud gha, er hät überhaupt nöd mit so öpisem grechnet!! Isch so herzig gsie, sini Auge händ so gstrahled!!  De Chauffeur vode Ape hät s’Tach dobe gha. Denn hani gseit: Ja sie, aber jetzt wos mal grad nöd regnet lömmer das Tach emal scho weg, oder?? Er hät mich denn ganz ghüslet aglueged und gseit: Ja aber ich bin denn nöd so schnell im montiere falls es denn wieder afangt! De hani gseit: Es regnet jetzt nüme, es hät gnueg regnet für hüt, jetzt nämemer das Tach weg, das chunt scho guet. So hämmers denn au gmacht und es hät tatsächlich vo denn aweg nüme gregnet, de ganz Abig nöd!! Womer im Hotel unde acho sind händ eus eusi Gäst mit Jubel und Applaus empfange, so herzig. Und alli händ e roti Clownnase agha   Mir sind denn ine und denn isch scho bald de ersti Gang cho. Nachem Cazpacho Andaluz händ min Schatz und ich e Dankesred ghaltet und churz i 5 Minute alli Gäst vorgstellt. Nachem Salat händ eusi beide Vätere e Fotipresentation gmacht, isch lustig und herzig gsie.  Denn isch de Hauptgang cho. Jammmmmiiii das Filet isch de wahnsinn gsie!!! Es sind sogar einigi Gäst id Chuchi go säge, dass sie no nie so es hammer Fleisch gha häged. Es isch wükli super gsie!!! Nachem Hauptgang hät en Fründ vo eus no öpis vorgführt, mir händ fast id Hose gseicht vor lache!!! Das isch de schreier gsie vom Abig!! Mir sind denn use und händ sogar eusi Himmelslatene chöne ablah. Das hätti nie denkt dass das no klappe wird!!!! Es isch traumhaft schön gsie. De Wind hät genau zum Schloss übere gweht, so sind alli Laterne zum belüchtete Schloss übere gfloge, hammer!! Nacher sind alli ine und mir händ schnell mini Schueh gwechslet für euse funny Weddingdance. Mir sind zu Nothing else Matters inegloffe und händ agfange schunkle. Und plötzlich hät d’Musik gwechslet. Es isch de Wahnsinn gsie. D’Gäst händ ihrne Auge nöd traut und hät gjohled und klatsched wie die Wilde! Mir händs soooo lustig gha!
Djane (Dj Bazilus) hät en super Job gmacht. So sind aschlüssend grad alli uf de Tanzflächig sie. Die Tanzflächi isch absolut grockt worde, eifach nume GEIL!! Sorry für de Usdruck, aber mir händ e sone mega Party gha. Näbed de Tanzflächi isch s’Fotobooth gsie. Das isch au so richtig heiss gloffe!! Es sind absolut alli begeistered go Fötelis schüsse, sich sooooo witzig gsie!! Die Requisite sind mega brucht worde. Es isch eifach es traumhafts Fest gsie. Eusi Deko isch super acho! Sogar die vom Hotel (wo all Wuche mindistens ei Hochziit dehte händ) händ eus riesigi Komplimet gmacht! D’Frau vom Chef hät gseit, sie hegi no nie so e tolli Deko bi ihne gseh!! Es hät au wuuunderschön usgseh, wie im Märli  So, jetzt hani eu aber gnueg belästiged…. Am morge am vieri (Fäst isch offiziell nur bis am zwei gange) simmer denn totmüed is Bett gheit. Mir sind am morge am drü no z’driessigste höch am Schlummi ghocked   Am Sunntig morge simmern o mit allne wo übernachtet händ go zmörgele, isch richtig gmüetlich gsie!! Leider isch scho alles verbie…es isch soooo schnell gange… Jetzt gahts morn ab id Flitterwuche, jetzt mueni no packe. Ich wünsche eu allne gueti zwei Wuche.
Bis glie, die verhürateti Nemo
PS: Ich han es Video vom Hochziitsabig wo zämegschnitte isch vode Djane. Falls öper das gern möchte gseh, denn eifach mir per PN d’Mailadresse duregä!
Nemo das tönt eifach traumhaft!!! es isch so schön hesches trotzdem gnosse!! föteli sind also au hammer. hesch richtig guet usgseh gnüss dini flitterwuche!!! wo ane gats?
Mega schöne Bricht. Danke vielmoool! Das tönt würkli nocheme super-tolle Fescht wo rundum glunge isch und i finds mega, dass ihr eu vom Rege nöd hend beidrucke loh.
Alles alles Guete wünschi dir und dim GG. und e wundervolli Ziit i euerne Flitterwuche! PS. Du gsehsch i dim Brutkleid sehr schön us!
Anmelden
gnüss dini flitterwuche!!! wo ane gats?
