| Schmetterling84 hat geheiratet...... |
|
|
1 2 3 4
|
|
|
|
|
|
|
|
|
|
|
|
|
|
|
22.07.13 11:20
schmetterling84 
|
Re: Schmetterling84 hat geheiratet......
So endlich mi Bricht wäri au gschriebe... Leider no ohni Föteli.. ig wart gaaanz gspannt uf die. Ha scho im Witz gseit, d Fotographin muess vermuetlich viiiell retuschiere bi mir 
Wie bi allne Brüt foht natürlich au mi Bricht chli vor dr Hochzyt scho a.. Monatelang ha ig uf de Daag hi gfieberet , vorbereitet, plant, bastlet oragnisiert.. und und und. Nur bi einere Sach het alles plane nüt gnütz und das isch halt s Wetter, wo ig s erste mol 2 Wuche vor dr Hochzyt gluegt ha hets ageh 26 Grad und Sunneschin.. Perfekt ha ig denkt. Si mir doch soo ufs Wetter agwiese wege euserer Trauuig unter freiem Himmel. Wie nid het chönne anderscht si, isch dr Wetterbricht immer wie schlechter worde. Und mi Stimmig au, bi immer sehr entspannt gsi Däg vor dr Hochzyt aber ab em Mittwuch isch alles guete Zuerede zend gsi und ig ha mi mim „Schicksal“ gfiegt..
Am Fritig hei mir dr Saal dekoriert und mini liebe Helferlis hei mi sehr unterstütz..D Mänenr si trotz de schlechte Wetter prognose goh dr Garte parad mache und hei mi immer wieder ufgmunteret ig miess mir keini Sorge mache.. Aber has nid chönne glaube, dr einzigi Hoffnigsschimmer isch dr Wetterbricht vo dr Landi gsi, wo gseit het wenns noime ufhellt denn i dr Nordwestschwyz.
Nach dem mir no mit eusne Fründe si goh esse bi ig is Bett und ha relativ guet gschlofe.. am 5i bi ig s erste mol verwache.. ha denn no Pfuust bis am 7ni und denn bi ig ufgstande und ha us em Fenster gluegt, grau und rege.. Do ig jo eh nüt ha chönne dra ändere ha mi parad gmacht und bi zu mine Eltere wo d Kosmetikerin uf mi gwartet het (natürlich bi ig vorher nomol i Saal und ha die letschti Kontrolle gmacht)
Do mi langsam alli nervös gmacht hei, ha ig mi Mami friehner zum coiffeur gschickt und ha chönne ganz entspannt ufs Sofa liegge und bi gschminkt worde.. die Ruh het mir grad chli guet do und ig ha langsam alles mit humor afo neh. Am halbi 10i isch mi Schwöschter (Tauzügin) cho und mir si zämmä zum Coiffeur gange, vorher no gschwind is Bluemegschäft und ig i Saal füre Apero goh luege öb alles parad isch.. Übrigens es het immer no gregnet ….
Mi Coiffeuse het mir e wundeschöni Frisur gmacht und bim ussegoh ha ig no mi Kollegin atroffe wo au dört isch ihres Frisürli goh mache.. Mi Coiffeus isch dr ganz Dag nur mit Gäscht vo euserer Hochzyt beschäftigt gsi, si het sogar miesse lüt abgäh will irgendwie alli zu ihre hei welle 
Nach em Coiffeur, bi ig no zu minerä Kollegin gange und ha ihrer Tochter no es Unterröckli brocht will si Blueme meitli isch gsi.. und wo ig bi ihre gsi bi und so richtig Jura gluegt ha (sie wohne i dr Höchi) gseh ig dass es hell chunnt. Und dr Rege het endlich ufghört….. Juuuppiii!
Aschliessend bi ig i dr Garage mi alts ersts Auto goh hole, e Escort Cabrio.. Has für de Dag dörfe uslehne.. Ganz entspannt bi ig bi mine Eltere acho und ihri Fründe vo dr Lenk si scho dört gsi und mini Fründine wo mi aglegt hei.. Fertig aglegt und parad ha ig no chli zyt für mi gha und denn si die erste Lüt scho cho, mi Schwöschter mit ihrem Partner und Sohn, mi Tätschmeisterin und d Fotographin, und mis einte Blumemeitli. Am viertel ab 2 si ig und mi Papi denn allei gsi und hei gwartet..Bi noni nervös gsi bis zu dem Moment wo ig dusse gstande bi uf eusem Husplatz und d Auto hupe ghört ha, ha gwüsst das isch mi Schatz wo i Garte fahrt mit sine Kollege (er isch vo sine „Vormänner“ abgholt worde mit mene Porsche und emene Ferrari..) Denn ha ig fascht nüm chönne warte, mir si is Auto gstiege und denn ischs los gange…
Pünktlich am halbi drei bi ig acho und alli Gäscht si im Garte gstande und hei uf mi gwarte.. Mini Bridesmaids und mini Bluememeitli si igstande.. Am morge ha ig no dr Kollegin ihrer Tochter aglüte öb si mir dr Schleier chönnt hebe will ig en nid im nasse ha welle nocheschleife (isch aber denn gar nüm nass gsi).. Wo ig mi Schatz vorne stoh gseh ha si mir denn d Träne cho.. D Sängerin het afo s Lied Kissing you singe und mir si los glofe. Irgendwie ha ig mi gfühl wie ufere Wulche. Mini Bluememeitli hei super Bliemli gstreut bis nach 10 Meter die ersti keini Bliete meh gha het und stoh bliebe isch, d Kollegin het d Körbli wieder ufgfüllt und mir si wieter glofe, churz druf die nechschti keini meh, es isch soo herzig gsi.. Die 2 si erst 3 gsi und heis sooo super gmacht.. bi denn churz bevor ig zu mim Schatz cho bi no a der Aleo Vera Pflanze hängebliebe und alli hei miesse schmunzle..Endlich vorne acho, het mi mi Papi mim Schatz übergäh, mir si Bedi überweltigt gsi.. will d Sängerin vor eus gsunge het, hei mir eus zu de Gäst chönnde dreihe und hei alli gseh.. Mini gueti Fründin (mir si friehner die beste Fründine gsi, hei denn dr Kontakt erst kurz vor dr Hochzyt wieder ufgnoh) het nur briellt und denn ha ig au wieder miesse afo..
|
|
|
|
22.07.13 11:21
schmetterling84
|
Re: Schmetterling84 hat geheiratet......
Mi Unkel wo d Trauuig gmacht het het alli Gäscht begriesst und denn het mi Schwöschter e chlini Red ghalte wie mir eus kenne glehrt hei, wie mir zämmächo si und über eusi Beziehig und Liebi verzellt..und wie nid anderscht z erwarte si alli sehr beriehrt gsi vo ihrne Wort. D Sängerin het denn a moment like this gsunge und mir hei eus wieder zu ihre gchert.. wo ig so id Mengi gluegt ha ha ig gseh dass mi Cousin chunnt cho z laufe, er isch es paar Dag friehner vo sinere Reis hei cho und het eus überrascht.. bi soo happy gsi… Denn het mi Unkel e ganz spezieli Red übere gemeinsame Wäg ghalte und mir hei paar mol miesse afo lache.. denn het eusi Sängerin s Lied you raise me up gsund und drzue dr Dudelsackspieler gspielt..es sich wunderschön gsi. Bim Ringtusch hei mir abgmacht eifach kurz öbis zsäge und wo mi Schatz dr Ring gnoh het, het er mit ganz wässrige Auge es Liebesbekenntnis gmacht, ha nüt gwüsst drvo und bi eifach sprochlos gsi… super alli hei uf mi gwarte und hei mir am Gsichtsusdruck agseh, dass es nid abgsproch isch gsi. So wie mi Art isch, ha ig halt gseit ig heig nüt söttigs vrobereitet und alli hei glache. Ha natürlich scho 2 3 Sätz vorbereitet aber nid so öbis. Zum Abschluss ischs Lied over the Rainbow gsunge worde.
Ganz spontan hei mir eus denn entschiede, zum Aperosaal z laufe mit allne Gäst und dr Dudelsackspieler vorus..Wow isch das hammer gsi, e riese Schaar isch durs Dorf glofe und alli Lüt si us de Cafis und Läde usse cho luege..
Vom Apero ha ig chum öbis mitbecho, vor luter gratuliere und Fötele. Am Schluss hei mir gschwind chli öbis gsässe und si denn goh d Föteli mache im Garte und bim Gschäft vom Schatz. Uf em Wäg zur Location si mir amene Feld verbi gfahre wos öbbe 20 Störch gha het, natürlich hei mir au dört no chli gfötelet.
Bim Parkplatz acho hei mir miesse warte will alli Gäst am Wegli spaliergstande si mit Lila Ballön und dr Dj Benz d Seifiblöterlimaschine het miesse astelle.. Zum Lied wouldn it be nice, si mir zum Saal glofe und hei s Kommando miesse gäh zum Luftballön abzloh..
Im Saal hei mir d Lüt gschwind no igwiesse wo si sitze und denn hei mir endlich öbis chönne trinke und ahnesitze (jeder zuekünftige Brut gib i dr Tip, nehmed Wasser is Auto, mir si fascht verdurschtet bim fötele)
Mi Papi het denn e Red ghalte und eusi Kollege hei es vorträgli gmacht wo Standesamt gheisse het, mir si vorne gsässe und dr Standesbeamti het eus über d Ehe ufklärt, statt as mir Antwort gäh hei hei abwechsligswies d Fraue oder d Männer es passends Liedli gsunge.. vom Döner Lied über Stille Nacht (zum thema Hochzytsnacht) isch alles drbi gsi.. bim abelaufe het plötzlich öbber gfunde mir mache e Bolonese.. und dr Dj isch grad druf igstiege.. so isch no vor dr offzielle Tanzeröffnig dr ganz Saal in bewegig gsi und wirklich alli hei mitgmacht…
Nach em Hauptgang hei mir dr Hochzytstanz gmacht, bi de erste Kläng vo Nothing else matter isch dr Rauch us der Maschine cho und mir si eifach über d Bühni gschwäbt.. und denn isch s Fest so richtig los gange.. Mir hei tanzt bis am 5i am morge, drzwüsche hei d Männer no e light-Chippendals stripp gmacht .. isch sooo super und herzig gsi.. und zur Zuegab het mi Maa au dörfe mit tanze.. d Fasnacht Zunft hetn o persönlichi Schnitzelbänk gsunge.
Es isch eifach e Traum Dag gsi und mir si glücklich aber sehr mied nach de 5i hei glofe als verhürotet s Ehepäärli…..
Soory für de lang Bricht aber het no meh chönne schriebe 
|
|
|
|
22.07.13 12:14
fami
|
Re: Schmetterling84 hat geheiratet......
wow schmetterling... das tönt bombastisch :-) Merci för dä Bricht, mir si d träne cho 
|
|
|
|
|
|
|
|
1 2 3 4
|
Anmelden
und dein Brautkleid ist wunderschön 
