| Snow_Floks Hochzeitstraum |
|
|
1 2
|
|
|
|
|
09.10.13 14:51
Snow_Floks 
|
Re: Snow_Floks Hochzeitstraum
So, ich hans au no gschafft oise schönschtig Tag in Wort zfasse:
Es bitzli ahgfange häts ja scho am Friitig. Ich bin mit minere TZ uf Züri is Hiltl go Zmittagässä und ahschlüssend simmer is Hürlimann Spa go Wellnesse. Mir händs extrem gnosse chli uszspanne. Am Abig bini den mini Hochziigsnegeli go mache.
Am Samstig bini scho uhh früä ufgstande, go tusche und hami gricht, am 7.30 hani scho müäsä bim Cuafför si, det hani den mini TZ wider troffe. Uf di 9ni isches den no zur Kosmetikerin gange. Det hät ois ire Fünd abgholt und mir sind zu ihre gfahre womer ois färtig gricht händ. Denn isch am 10.45 au scho oises wunderschöne Oldsmobile vorem Huus gstande wo ois ad Fotilocation pracht hät. Zum glück hämmer wunderschööns Wätter gha und drum hämmer ufem Schloss in Uster chöne Fötele. Det hämmer scho min GG und sin TZ ahtroffe und händ z’Vierte vili schöni Föteli gmacht.
Oisi TZ‘s sind den irgendwänn gange und mir händ nochli en ego Shoot gmacht. Dänn hät ois de Fahrer vom Oldsmobile (de Firmgötti vo mim Ma) uf Fehraltorf pracht, det binich möglichscht unuffellig is Chilegmeindshuus gschlüpft und han di ganzi Bunti Gsellschaft beobachtet bim ihtrudle 
Am foif vor zwei wos alli Gäscht id Chile gschüücht händ, oisi Bluememeitli und de Ringbuäb brav güäbt händ isch mich den de Papi cho hole. (Leider isch d’Chileglogge grad i de Reperatur xi). Zume klassische Hochzigsmarsch uf de Orgle hämmer dänn ihzug ghalte. De Ringbuäb, d’Bluememeitli und de Papi und ich. Alli händ glueget…d’Chile isch papevoll xi und vorne hät min Schatz uf mich gwartet.
D’Predigt isch supper xi, weis zwar fascht nüt me, er hät irgendöpis verzellt vo Küsse seigi gsund  Diä vier Liebder vo oisere chliine Bänd (Klavier, Ukulele und Bongos) sind au de Hit xi.
Am schluss händ mer ganz unklassisch müäsä warte bis alli d’Chile verla händ. Si händ dusse en Gang bildet und sind mit langstiilige Rose spalier gstande. D’Musig vo mim Schatz hät en Marsch gspillt. Mir sind bis as ändi gloffe händ ois es Glas ztrinke gschnappet und ahfa alli Gratulatione entgege znä…. Huiiii, nuscho das isch en grund e Hochzig chli zhalte… 150 Nase gänd scho chli öpis ztue, und als Frau chunsch eifach topplet so villi Küssli über wiä als ma!
Irgendwänn hät mi den de oise Tätschmeister entfüärt, da ich no han müäsä än Marsch go tirigiere. Isch so tradition bi de Musig. Und den sind gratulatione wiitergange. Bruutstruus rüärä isch au luschtig xi. Han zwei alhloif brucht. Bim erschte mal hami fascht sälber abgschosse.
Den no de Maraton vom Gruppeföteli mache und scho wärded alli id Autos gschüücht und ab gaht d’fahrt richtig Restaurant Römerturm im Cherenzerberg.
|
|
|
|
09.10.13 14:54
Snow_Floks
|
Re: Snow_Floks Hochzeitstraum
Mir voruus und alli schön brav hindedrii  Uf de Autobahn hät sich den de eint oder ander getraut ois z’überhole! Uf de Passstrecki in Cherenzerbergufe hämer den churz ahghalte und alli füräla. Mir händ den en chliine Garderobe wächsel gmacht. Min Schatz hät vonere wiise ufe roti Flüüge gwächslet und ich han vo mim Glitzergürtel ufen rote Gürtel gwächselt. Denn isch oisi Fahrt au scho wiitergange. Mir händ den direkt uf Terrasse zum Apero törfe, da oisi TZ‘s scho für ois IhChekt händ und alles oises Gepäk ufs Zimmer pracht händ.
Zum Apero häts Tinto di Verano, Nüssli und e bombastischi ussicht uf de Walesee und ufd Lindtebeni gä. Scho bald simer vom Tätschmeister in Fäschtsaal gschüücht wordä  Det hämmer alli oisi Plätz ihgno er hät churz öpis gseit und den hänts au scho de erschti Gang serviert. Nüsslisalat mit Ei und Späck…
Nachem erste Gang hät min Schatz e churzi Vorstelligsrundi gmacht. Er hät vo Tisch zu Tisch alli Vorgstellt, churz de Name und d’Verbindig zu ois.
Den häts au scho Suppe gä. Chürbisgrämsuppe mit Rohschinkestreifli drin. Für mich häts en Crevettecocktail gä, da ich nöd gärn Suppe han und min Schatz en riiise Schatz isch 
Mir händ de ganz Abig en DJ gha und min Papi hät als Überraschig no es Musikerduo angaschiert. Eigentli heti min Schatzi mit dene müäsä mitspile, aber diä zwee hend nöd chöne Note läsä. Also händ churzerhand drü Gäscht vo de Musig usghulfe. Si händ zvierte 2 Lieder gspillt, min Schatz ufem Sax, e Klarinette, e Trompete und es zweits Sax. Isch no schön xi und witzig will min GG d’Note nöd gha het im vorus…
Als dritte Gang häts Lachs mit Riis gä, anere Honigmarinade….hmmm…
Dän hät sin Papi e churzi Reed gschwunge und mine den au no. Vo mine Eltere hämer no es Buech übercho wo si sälber gstaltet händ. Jede Gascht hät e Siite gmacht, alles Ort vo de Schwiiz womer unbedingt müänd go ahluege. De Titel vom Buech hät ganz vill Chindheitserinerige; „Es bitz Kultur muen si“ Das hät mis Mami immer xeit, wemer sind go Reise (Und dassimmer vill) 
Zum Hauptgang häts Rindsfilet mit Tomate und Chäs überbache gä, Härdöpfelgratain und Saisongmüäs. Derzue es feins tröpfli Rotwii.
D’Musigkollege vo mim Schatz händ no en Reim ufgfüärt wo sich immer am schluss uf: „-aber bruuche tüänders jede Tag-„ greimt hät. Derzue häts e riiiise Chischte voll WC-Papier gä, wo i jedere Rollä es Doller-Nötli gsteket hät.
Für eis Pärli hämer im voruus müäsä Liebesbriefe ihschike. Diä händs ine Chischte ta, en Wii dri und Schoggi, diä Chischte hämer müäsä Zuenagle. Und wemer mal voll e Kriise händ (also nur so richtig, churz vor de Trännig) sölemer ois a diä Chischte erinnere und si ufmache, ois diä Liebesbruiefe vorläsä, Wii trinke und Schoggi ässä! Ich find das e u härzigi idee
Mim Schatz sin Papi und sin Unkel händ mit ois no es Spiili gmacht. Mir händ es Härz übercho wo u feinere Siite Ich und uf de andere Du stat. Dänn händs 20 Frage gstellt und mir händ müäsä mit Ich oder Du antworte. Bi 16 simer ois voll einer Meinig xi
Dä Hochzigstanz isch u schön xi, aber halt chli schwirig, da mis Chleid bim beschtä willä nöd fürs Tanze gmacht isch. Aber irgendwiä hanis trotzdem gschaft nochli z’Tanze.
Uf dä Hochzitstanz isch natürli d’Hochzigsturte cho. Diä hät e Kollegin vo mir gmacht. Leider hätsi s’Restaurant z’wenig chüäl glageret und si isch liecht usenand gheit. Aber diä isch den de Hammer fein xi, si isch razeputz verputzt wordä
Denn nochli de Abig usklinge la, chli mit de Lüt rede, chli Tanze. Am halbi drü hämer ois den ad Bar verschobe und ca. am drü simer, also min Ma und ich, is Bett. Ich weis aber, das di letschte erscht am sächsi is Bett sind! Dementsprächend hät de eint oder ander au no e chlini Fahne gha bim Zmorgeässä.
Vorem Zmorge händ min Ma und ich ois no es Bad i oisem Wirlpool im Zimmer gönnt. Wämers scho hät, muen mers ja au nutze. Mir sind dementsprächend au di letschte bim Zmorge xi
Alles i allem isches e wunderschöni Hochzig gsi, eifach traumhaft uns so wiä mirs ois vorgstellt händ. Au dank em tolle ihsatz vo oisne TZ, Tätschmeister, Fründä und Familie. Ohni diä hettemer nie so e tolls Fäscht törfe fiire.
|
|
|
|
|
|
|
|
|
|
|
|
|
|
|
|
|
|
1 2
|
Anmelden
