| The wedding that rocks |
|
|
1 .. 3 4 5 6 7
|
|
|
|
|
24.06.14 12:11
malinchen 
|
Re: The wedding that rocks
Bevori mi Bricht afange no schnäll d Antwort fürd Sue: Ja, mi Papi het die sälber zuegschnitte. Aber i ha sooooo Glück gha, haha, i ha nur Wägwiser gmacht wo nach rächts zeige.  Ha mir genau nix drbi überleit gha und eifach Glück gha dass es de tatsächlech bi jederä Abzweigig rächts gange isch.
Soo, und jetz mi Bricht:
I weis gar nid wo afah... Ig ha ja scho abem Di Mittag frei gha und die ganz Wuche no chli Sache vorbereitet und bastlet. Leider hets z.b. fürd Chalkboards de glich nümme glängt, aber irgendwie hani dänkt isch ou nid schlimm wenn mir nid alles hei was gad so trend isch...  Am Donstig abe si mir no vor TZ vo mim GG iglade gsi zum ga znachtässe. Mir hei gahnt dases um ihres Hochzyt geit wo sie imnä Jahr wei fiire, süsch wäre mir äuä nid gange es isch sooooo stressig gsi. I ha när wo mir hei cho si no bis id Nacht am halbi 3 mini Nägeli u Pedicure gmacht, no d Chilleheftli fertig bastlet und die letschtä Sache id Chischte packt. Am Fritig morge am halbi 8i hei mir de scho wieder müessä ufstah wöu GG het müesse ga hälfe ds Zält bim Apéro ufboue und mni Besti isch am 9i zu mir cho Torte fertig mache. I ha no gad schnäll Zyt gha ä Brief für mini Elterä, GG's Elterä, mini Besti und mi Brüeder z schribe bevor sie cho isch. När hei mir schnäll mal gmerkt, dass d Torte no z fest gfrore isch, für dass mir se chöi fertig mache. Drum hei mir när schnäll dr Tagesplan gänderet und si ou zur Apérolocation ga afange Pompoms uffalte. Churz nachem Mittag isch de d Floristin zur Chille cho und i ha gad schnäll mi Brutstruss und d Astecker für GG, TZ und Papis chönne ga abhole und scho d Chilleheftli verteile etc. I bi soooooo positiv überrascht gsi vo de Blueme, sie hets eifach genau so härä bracht wie igs mir vorgstellt ha obwohl ig ihre das gar nid so genau ha chönne erkläre wöu i vo Pflanze eifach kei Plan ha. Am Nami am 3 si mir de wieder zu üs hei gange und inzwüsche isch d Torte gnue uftout gsi. Hei de no dr Fondant drum dah und se ufenand ufe bout. Es isch sooo luschtig gsi... Es isch totestill gsi ir Chuchi wöu mir üs so hei konzentriert und ab und zue het me eifach so schock-Grüsch ghört wöu üs fasch öpis wär abegheit oder so. Wo mir fertig gsi si, hei mir schnäll im Resti aglüte und gseit dass mir se gli bringe und mim Papi dass er no die rästlechi Deko ou gad cha det ane bringe. Mir si när ids Outo ghockt, mini Besti mit derä riese-Torte ufm Schoss, und ig ha versuecht müglechscht ruhig z fahre... Aber üse Mini het so grucklet und jedes hügeli uf dr Strass het sich agfüehlt wie ne riese Absatz. Isch aber alles guet gange und mir si heil mit derä Torte acho. Hei se när gad det chönne i chüelruum stellä. När hani gseh dass sie üsi Tische sogar scho hei ideckt gha, de chani no gad chönn d Brautzilla i mir füetere und d Namens-Schildli sälber häre due. Mir hei när no mim Papi ghulfe die rästlichi Deko uslade und hei när det no es Bier trunke zämä. Mini Besti het när hei müesse wöu sie no ä Arbeit het müesse fertig schribe wo sie ir nacht am 12i het müesse abgäh - die ärmsti! Ig bi de zu de Eltere vo mim GG hei gange wöu mir beidi bi ihne hei übernachtet. Sie hei ir Zwüschezyt d Apérolocation fertig dekoriert... Das het mi soooo gstresst gha wöu ig hät die Pompoms unbedingt sälber wöue ufhänge, aber wöu mir dr Plan hei müesse ändere wägä dr Torte isch das när eifach nid müglech gsi und i däm Moment ischs mir irgendwie egal gsi... I ha völlig chönne loslah und eifach vertraue, dass sie das sicher schön mache. Mir si de vorem Znacht no schnäll ufe gfahre alles ga aluege und es isch super gsi...  Hei när no dr Fuessbalmatch gluegt vor CH, resp. i bi nach dr erstä Halbzyt mal ga mini Haar wäsche und strecke wies mir d Coiffeuse het uftreit gha wöui nümme ha chönne zueluege...  Hei de när no es Gläsli Wyy trunke mit mim Schwiegerpapi und am halbi 12i bini totmüed is Bett gläge und innerhalb vo paar Sekunde igschlafe gsi. Ha när ou bis churz vorem Weckerlüte mega guet gschlafe und woni bi ufgwacht ischs genau ds gliche Gfüehl gsi wie wenn mir amigs als Chind i Europa-Park si. So: "Yesssss, jetz geits ändlech los!" Aber i bi übehoupt nid nervös gsi... Bi när is Bad mi go schminke, ha gwüsst i ha ei Stund zyt bis mi Papi mi chunnt cho abhole und ha dänkt, i luege jetz nid ufd Uhr und mache eifach mal... Ha mi de seeleruhig gschminkt bisi mir ha gfalle und woni bi fertig gsi, isch fang 7ni gsi. Bi när abä id Chuchi und ha no mit mim Schwiegermami es Kaffi trunke und mega feine Aprikosechueche zum zmorge gässe. Mi Papi isch de scho e viertelstund z früeh da gsi und het ou no schnäll es Kaffi gnoh... Si de när genau nach Zytplan losgfahre zum Coiffeur und bi sogar 10 Minute z früeh det gsi. Sie het de gad agfange und de isch ou mini Besti itroffe. Sie het sich vo dr andere Coiffeuse gad glichzytig chönne lah frisiere und het am Schluss sogar no länger brucht als ig. Ig ha de no mal es Kaffi trunke und uf sie gwartet...
|
|
|
|
24.06.14 12:34
malinchen
|
Re: The wedding that rocks
Mi Papi isch sich unterdesse hei ga alegä und het üs de wieder abgholt. Wo er isch ine cho hets mi fasch umghaue, er het sooooooo guet usgseh i sim Azug!!! Mir si de no schnäll bire Coop Tankstell ga ne Fläsche Schampus choufe wöui die bi GG's Eltere ha vergässe gha. När si mir zu mim Brüetsch gfahre wo mis Chleid ja scho uf mi gwartet het... Unterwägs isch mini Besti scho mega nervös gsi, i bi immer no total ruhig und glasse gsi - zwar ufgregt und voller vorfreud aber nid nervös. Ha mi mega guet gfüehlt... Wo mir de si acho hani mi irgendwie mega verschwitzt gfüehlt u bi no schnäll unter d Duschi. D Frisur isch zum Glück nid nass worde und d Abchüelig het mega guet dah. Woni mi wieder früsch ha gfüehlt hani de agfange mis Chleid alegä. Mi Brüetsch isch soooo härzig gsi. Er isch ja vor Verchöiferin instruiert worde und het sich alles mega guet gmerkt gha. D Andrea het mega cooli Föteli gmacht und isch de när scho los düüset zur Chille. Mir hei no zyt gha für nes Glas Schampus und ig bi so bir Chuchi gstande i mim Chleid und ha dr Verschluss abgnoh. När machts eifach Plopp - dr Korke wäg und dr Schuum louft scho überd Kombination, i ha no gad chönne rückwärts hüpfe und mis Chleid isch umnes Haar troche blibe. Hei de när agstosse und de isch mi Papi, mit mire Beste und mim Brüetsch losgfahre. Unterwägs hei mir no bir Apérolocation mis Strüssli und d Asteckerli abgholt. Wo mir när zur Chille si gfahre, si immer no mega viel Lüt dusse umegstande... Mi Brüetsch isch när usgstige und het denä gseit sie sölle mal chli vorwärz mache. Wo när alli si dinne gsi het dr Pfarrer es Zeiche gäh und d Musig isch los gange. Zersch isch de mini Besti mit mim Brüetsch ine gange, mi Papi und ig hei no chli gwartet und när si mir ou ine gloffe. Mir hei üs mega müeh gäh langsam z laufe, aber dr Gang isch eifach so churz gsi dass när halt glich nur d hälfti vom Lied isch düre gsi... Aber dä Moment woni mi GG ha gseh i sim wunderschöne blaue Azug det vore uf mi warte isch mir alles andere egal gsi. Er het gad mega füechti Auge übercho und ig ha sooooo ghofft dass er nid afaht hüüle, de wärs bi mir när ou passiert. Aber er isch schön tapfer bliebe und wo mi Papi mi het übergäh hani mi so müesse beherrsche ihn nid scho z küsse.  Mir si de härä ghockt und dr Pfarrer het alli begrüesst und ä wunderschöni Predigt ghalte. Mini Besti het ihri Läsig ou super härä bracht obwohl sie so nervös gsi isch... De ischs scho zur Trauig cho und GG und ig hei üsi Verspräche vorgläse. Es isch meeeega schön gsi und d Gäst hei reihewiis d Nastüechli us de Chilleheftli gnoh... GG und ig si aber zu däm Zytpunkt mega gfasst gsi, hei beidi lut und dütlech chönne rede und fasch nüt müesse abläse. Aber GG het vergässe gha d Ringe scho vom Ringchüssi z löse u när het er mega lang brucht für se useznäh, aber isch mega luschtig gsi. Wo mir üs de ändlech hei chönne Küsse ischs soooo es schöns Gfüehl gsi, wie bim erste Kuss... Aschliessend het üs dr Pfarrer gsägnet und de ischs scho fasch verbi gsi. Si när nur no Mitteilige vom Pfarrer zur Kollekte und vo de TZ zum witere ablauf cho. De si mir als ersts use gange und dusse hei mini Arbeitskollege mitemnä mega schöne Spalier uf üs gwartet... Üsi TZ hei de es "Gfährt" für üs parat gha wo mir drmit zum Apéro hei chönne fahre. Mir hei mal ä Witz gmacht gha über eine vo üsne beste Fründe, dass er doch söll ufemnä Bierfass id Chille cho z fahre... De hei sie doch tatsächlech es Bierfässli ufemnä Leiterwägeli gha. Det hani när müesse druf sitze und GG het mi so müesse zum Apéro zieh. Haha, es isch soooo witzig gsi. Mir si när bim Apéro acho und woni ds Buffet ha gseh bini ächt überwältigt gsi. Es het eifach super usgseh und isch mega guet i üsi Deko integriert gsi. Sie hei det ou no paar Pompoms druf gleit gha wo no übrig gsi sind und es het eifach perfekt usgseh. Wo när alli Gäst si itroffe gsi, hei GG und ig zerscht ds Buffet eröffnet, damit d Gäst scho hei chönne zuegriffe und nid hei müesse warte bis mir alli Gratulatione hei entgägä gnoh. Das isch ou würklech schnäll gange, was i soooo ghofft ha. I hätt nid möge so lang det stah und Händ schüttle - ou wes ja lieb gmeint isch vo allne. Üsi Sirup-Bar isch meeeega guet acho bi de Gäst. Es hei alli gschwärmt vo üsne Sirup und ou d Idee mit de Garette und Zuber als Getränke-Chüeler si globt worde. Mir si när eifach chli umegloffe und hei üs mit allne unterhalte, es isch gmüetlech und locker gsi - genau wie mirs hei erhofft gha. Wöu mir chli weni Festbänk gha hei, het GG's Brüetsch am Fritig no Sunneschirme und Dechine organisiert gha und das hei d Gäst mega gnosse, si chli det is Gras gläge und heis chönne gniesse. Fürd Chind hei mir es Kubb, Boccia chugle, Fäderball etc. drbi gha und das isch ou super acho. Die hei sich mega schnäll gfunde und det zämä gspielt. Vom Photobooth hani ehrlechgseit gar nix mitübercho, i weis nid genau ob das isch gloffe und sich d Lüt würklech hei gfötelet... 
|
|
|
|
24.06.14 12:57
malinchen
|
Re: The wedding that rocks
Am 1 isch de d Band cho (wooohooo, es het klappt!!! ) und hei ihres züg ufbout. Gli druf hei sie de ufgspielt und es isch soooooo toll gsi. Mir hei eigetlech nid so viel Platz gha voredranne und de hei GG und ig spontan gfunde, dass me ja scho jetz chönnte afah tanze. Hei churzerhand dä Tisch wo am nöchschte isch gstande chli ufd Site gstellt und hei agfange tanze. Es hei sich gad mega schnäll anderi Gäst drzue gsellt und es isch mega abgange... Ca. nach dr hälfti vor Spielzyt hei üsi TZ no es Spieli mit üs gmacht. Mi GG het es meeeeega Musik-Wüsse und mir Musik isch üs beidne ja mega wichtig. Drum hei alli Gäst es Lied igschickt gha und de hei sie ä CD zämägstellt wo mir de i üsem Bus chöi lose we mir unterwägs si - soooone cooli Idee! Für das mir se überchöme, hei mir aber alli Lieder müesse errate wo druffe si - und zwar schnäller als d Gäst. Es isch soo luschtig gsi und zum Teil no rächt schwär, wöu halt würklech alles mügleche isch druffe gsi. Mi Uncle z.B. lost mega gärn Oper und da hei mir natürlech kei Ahnig gha. Und ou zum Teil so volkstümlechi Schnulzelieder hei mir nid kennt. Am Schluss hei mir aber trotzdäm meh Punkt gha als d Gäst und d CD übercho.  Im Booklet hei alli no e persönleche Text zu ihrem Lied hinterlah, das isch sooo schön. Mir hei ersch gester Zyt gha das i Rueh z läse und GG het gad voll agfange hüüle wo er die Texte het gläse - sie si würklech wunderschön!
D Band het när no mal chli gspielt und das isch würkelch soooo cool gsi. D Gäst hei tanzt und würklech Spass gha. I bi soooo froh dass mir sones längs Apéro hei gha! I würd das wieder so mache. Es si ja einigi skeptisch gsi und hei Bedänke gha, dass es de dä Gäst längwilig wird oder so. Aber es isch so mega gmüetlech gsi, mir hei mit allne zmingscht churz chönne redä und es isch eifach würklech sone chilligi Garte-Party-Atmosphäre ufcho.
ca. am 5i hei üsi TZ de alli Abägäst drzue ufgrüeft langsam zu de Outos z gah damit mir hei chönne ä Auto-Schlange organisiere für zum Resti z fahre. I ha zersch dänkt das isch chli doof wöu mir ja ä gueti halb Stund unterwägs gsi si. Aber es isch när gad super gsi, GG und ig hei chli chönne verschnuufe, für üs si und die erste Idrück chli verdaue...
Wo mir de si acho hei mir zersch no es Spiel ufem Parkplatz gmacht. Sie hei es Liintuech ufghäbt und ig ha müesse ä Chorb voll alti Täller übere schiesse und GG hets müesse fange. Uf jedem Täller isch ä "Guetschiin" gsi vo de Gäst, z.B. fürnes Nachtässe, ä Wanderig etc. und wenn GG ds Täller het chönne fange dörfe mirs de ilöse. Da ig volley spiele ischs für mi nid sones Problem gsi die Täller schön übere z wärfe und GG het ALLI chönne fange! Fürd Gäst ischs gloub när chli längwilig worde und irgendwenn hei sie d Distanz vergrösseret, aber mir heis immer no super gmacht. 
Es het de für alli ä Welcomedrink gäh uf dr Terrasse vom Resti und vieli si eifach mal chli det am See gsi und hei die schöni Location gnosse. GG und ig hei i derä Zyt mit dr Andrea es paar Föteli nur vo üs zwöi gmacht und mir heis mega gnosse. Mini Frisur isch zwar scho nümme ganz perfekt gsi und GG het sis Jacket nid möge alege wöus eifach z heiss wär gsi - aber i gloub die Fotos si wunderschön worde (wasi ou nid anders erwartet ha bi derä super Fotografin ). Aschliessend si mir de ine is Resti und hei ds Vorspiisebuffet eröffnet. D Tischdeko mit mine Väseli woni bastlet ha und denä wunderschöne Blueme vor Floristin isch dr HAMMER gsi. Es het viel besser usgseh als igs mir vorgstellt ha. D Gäst hei ou alli mega gschwärmt über all die Sache wo mir sälber hei bastlet und heis würkli gschätzt, das hätti gar nie erwartet und isch ja ou nid ds Ziel drvo gsi. Gfröit hets mi natürlech trotzdäm mega all die Kompliment z ghöre und z gseh, dass sich die Arbeit glohnt het. Ds Ässe isch ou würklech super gsi, aber i bi irgendwie so ufgregt gsi und total im Film dasi gar nid so hunger ha gha. I ha eigetlech nur gässe wöu mir ja ds Buffet hei müesse eröffne.
Vorem Houptgang het de GG's Schwo no ä Präsi mit Föteli vo üs als Chind gmacht. Sie hets mega guet gmacht gha, immer es Föteli vo GG u mir so im Verglich u soooo luschtig kommentiert. Z.b. gits vo mir als Chind mega viel Föteli woni im Hushalt hilfe (Glätte, Backe, Blueme giesse etc.) und vo GG eifach so am Strand am liege, ufm Sofa am liege etc. Haha, d Lüt hei sich kaputt glacht... Denn hets dr Houptgang gäh und dä isch ou super gsi - aber ou det hani irgendwie nid würklech mögä ässe - kei Ahnig würum. Es isch mir guet gange, i ha mi super gfüehlt aber hunger hani irgendwie nid gha. 
|
|
|
|
24.06.14 13:17
malinchen
|
Re: The wedding that rocks
Gad näbem Resti het sone finnische Verein Mittsommer gfiiret und de sie die üs mega lieb cho frage ob mir nid möchte mit ihne z füür azünde. Isch mega cool gsi, mir si när alli zu ihne übere gange und sie hei ds Füür azündet und mega viel finnischi Lieder gsunge. Sie hei üs allne ou es Liederheft gäh und mir hei so guet wie müglech versuecht mitzsinge. Dür das het sich aber alles mega verzögeret und mir hei ersch mega spät agfange mitem Dessert. Wo üsi Torte isch ufttischt worde hei alli mega gstuunet dass mini Besti und ig das härä bracht hei. Es het üs niemer zuetrout und das isch ja ou chli üsi grössti Motivation gsi. Mir hei när d Torte agschnitte und ds Mässer när am Choch übergäh wo für üs witergmacht het. Wo ca. d hälfti vo de Lüt scho am Platz isch gsässe hani gseh, dass ersch dr oberst Stock verteilt isch und ig ha dänkt: "Shit, mir hei viiiiiiel z viel Torte gmacht!" Aber es heis alli sooo fein gfunde dass sie immer wieder so go hole und am Schluss isch nur no ca. ei drittel vor unterste Schicht übrig bliebe.
Gad nachem Dessert hei mir de d Tanzflächi eröffnet mit üsem Tanz. Es isch alles guet gange, aber es isch rächt schwär gsi mitem Chleid z tanze. I ha ja kei Reifrock gha und es isch rächt schwär gsi dass GG oder ig nid irgendwo druf stöh. D Schleppe hani zwar chönne ufe mache, aber es isch när hinge glich no chli länger gsi. Aber d Lüt hei fröid gha und mega klatscht und hei de ou gad wieder agfange tanze. Später ischs aber irgendwie chli doof gsi, wöus so schön isch gsi uf dr Terrasse si alli Gäst dusse ga hocke und mir hei ja nur dinne dörfe Musig lah loufe... Am Afang hets GG und mi mega gstresst dass fasch niemer dinne tanzt. Aber irgendwenn si mir när eifach ou use ga hocke und de ischs mega gmüetlech gsi. Und fürd Gäst hets ja so gstumme, es isch niemerem längwilig gsi oder so aber es isch halt de doch für alli rächt ä lange Tag gsi und vieli hei eifach ou nümme so möge. Nur die alti Generation het immer no dinne mega abgrockt, da mir extra viel Oldies ufd Playlist packt hei und sie halt nümme so oft Glägeheit hei zu so Musig z tanze. So um die 1 hei sich de die erste langsam verabschiedet und am 3 isch de nur no so dr hart Kern ume gsi. De hei mir üs ou langsam ufe wäg zu mine Eltere gmacht. Det isch dr einzig würklech negativ Punkt passiert wo mi im Nachhinein mega närvt: Mir si scho fasch dusse gsi, die meiste si scho im Auto ghockt wo dr eint vom Resti plötzlech mi GG am Arm packt u seit dass de no nid zahlt sig. Aber mir hei abgmacht gha, dass alles uf Rächnig geit - i meine sorry aber mir zahle sicher nid irgendwie 6'000.- bar oder mit KK, mir hei gar nümme so viel freii Limite gha und loufe a somne Tag ja ou nid mit so viel Gäld ume. När het dr Typ mega gstürmt und schlussändlech ar Cheffin hei aglüte (ir Nacht am 3!) zum das Abkläre. Wo sie ihm de gseit het dass alles ok isch hei mir ändlech dörfe gah... Obwohl vorhär alles top isch gsi, het das ä mega negative Nachgschmack hinterlah bi üs! Isch mega schaad eigetlich...
Bi mine Eltere dehei bini när meeega tot gsi und ha mi gfröit us em Chleid chönne z stige obwohl i mi dr ganz Tag würklech mega wohl gfüehlt ha drmit. Mir si de ou gad mega schnäll im Bett gsi, die andere hei ou ihri Schlafplatz bezoge. Mini Besti und ei Fründ vo üs hei gad unter freiem Himmu gschlafe, 4i i üsem VW-Bus-Zält und die andere 9 hei alli es Zimmer im Huus gha. Wöu mir z Fänster hei offe glah, si mir när glich ou scho am morge am halbi 8i wieder wach gsi wöu die wo dusse hei gschlafe natürlech scho wach si gsi wöus häll und im Zält vor allem heiss isch worde. I bi de ga düschele und ha mis wunderschöne Chleid für am Tag danach agleit. Si när alli ufd Terrasse ghocket, hei Kaffi trunke und d Idrück vom gestrige Tag teilt, glachet und s eifach gnosse. Am 10ni si de no GG's Elterä und sini Schwöster wo deheim hei übernachtet cho und mir hei zum letschtä Mal a däm Weekend es Buffet eröffnet. Dr Brunch wo mis Mami het gmacht gha isch dr absolut hammer gsi und ig ha ou ändlech wieder hunger gha und richtig chönne zueschlah.
Gägä Namitag hei mir üs de alli langsam ufe heiwäg gmacht und wo GG und ig am Nami am 4i alli Gschänkli hei i üsi Wohnig gschafft gha, si mir sooo kaputt gsi, dass mir zersch mal si ga schlafe. Zwöi Stund später hei mir üs gnue gstärkt gfüehlt fürd Gschänkli uszpacke, das isch dr Moment gsi wo bi mir när doch no mega viel Trändli gflosse si. Es het mi so berüehrt wie sich alli mega viel müeh gäh hei bim Verpacke und so kreativ si gsi bi denä Gschänk - wo mir doch gar nid erwartet hei! Sogar üsi TZ wo scho so mega viel Zyt und ou Gäld investiert hei für all die Überraschige etc. hei üs no mega viel gschänkt und woni dr Brief vo mire Beste ha gläse ischs de eifach z viel gsi für mi. D Träne si nur no gloffe bis mir alles hei uspackt gha und no chli länger...
|
|
|
|
|
|
|
|
|
|
|
|
|
|
|
|
1 .. 3 4 5 6 7
|
Anmelden
Kennt öpper ä Trick wie me das cha mache? I due immer d Qualität abeschrubä, aber i ha im Normalfall natürlech nid so hochuflösendi Föteli u de machts nid so viel us... 