Am 5.5.12 am Morgä am 5.45 bin ich vor luter Ufregig und Vorfreud verwached. Wätter: Rägä
Mini TZ isch mich am 7ni cho abholä für zum Coiffeur. Mir händ dänn gseit, janu, söll eifach allä Rägä jetzt abächo.. Bim Coiffeur häts Champagner geh zum uf üsä Tag azstossä. Am halbi 10ni sind mir wunderschön frisiert und gschminkt zu minnerä TZ hei go s Chleid aleggä. Wätter: Rägä

TZ`s GG hät üs dänn i ä alti Fabrik zum fötelä brocht. Det han ich zum erstä Mol GG gseh, wow! Er hät umwerfend usgseh! Di erst halb Stund händ mir mit üsem Sunneschii gfötelet, er isch nacher vo sim Götti abgholt wordä. Üsä Fotimarathon isch dänn bis am halbi 1 wiitergangä, zämä mit üsnä TZ. Min Papi isch mich dänn cho abholä und mir sind zu ihm hei. Wätter: Rägä

Am viertel ab eis isch min Chauffeur mit em Rolls Royce üs cho abholä. Mir sind richtig Chilä gfahrä. Vor dä Chilä sind scho alli Gäscht versammlet gsi und mir sind mit emä riisä Gehupe det acho. D Lüt sind dänn i d Chilä, min Papi und ich händ üs vor dä Chilä numol chli gsammlet - huiii, bin ich nervös gsi Dänn hät üsi Sängerin Amacing Grace agstimmt und min Papi hät mich zu GG gfüehrt. Ich glab me hät mis Herz ghört chlopfä. Mir händ ä wunderschöni Trauig gha. Eigentlich wäred mir zu brown eyed girl vom Van Morrison usgloffä, bevor üsi Sängerin das agsimmt hät, seit dä Pfarrer: bliibet bitte no dinä, s git nacher no ä Überraschig. Mir händ tanzed und klatsched zu brown eyed girl und händs eifach gnossä. Nach dem Lied isch mis Mami und mini Schwöschter zu dä Sängerin und händ vom Musical Grease You are the one that i want gsungä - hammer!! Händ üs das eigentlich als Uszugslied gwünscht, händ aber gseit es müessted zwei sii wo sich asinget. Und will mir ja eifach ä Sängerin gha händ hämmer dänn das halt gstrichä..Mir händ soooo Freud gha a derä Überraschig und es isch eifach mega gsi. Es händ alli während em Lied gsungä und tanzed i dä Bänk - es isch ä wahri Freud gsi! Dänn sind mir mit dä Bluemächind zur Chilä us gloffä. Wätter: SUNNÄSCHIIIIIII!!!!!!!!!!!!!!

Mir händ en schönä Apéro gha und no es paar Gruppä-Föteli gmacht. Am halbi 6i sind mir mit dä gladnä Gäscht uf s Schiff und händ ä Stündigi Fahrt is Restaurant gnossä. Ufem Schiff hät üsi TZ ä Hochzigszitig verteilt mit villnä uu lässigä Bricht vo mim GG und mir dinä. So guet gmacht gsi! Mir händ ufem Schiff chönnä verussä a dä Sunnä sitzä, das hetted mir üs nach dem verrägnetä Vormittag nie träumä loh!

Bim Restaurant acho händ mir die Wunderschön Tischdeko bewunderet wo üsä Florischt üs gmacht hät. Scho bald isch dä erschti Gang cho - mmhhhh! Zwüsched jedem Gang häts ä chlini Darbütig geh, alli würkli guet gsi, di einä sehr luschtig Alli Gäscht händ vo TZ d Ufgab übercho ä Fläschä z dekorierä wos üs dänn a dem Obig überreicht händ. Do hätts ja ganz gueti Sachä drunder gha. Zum Teil riiisä Kunstwerk. Nach em Ässä händ mir tanzed und gfiiret. Wos ganz dunkel gsi isch, händ üsi TZ di ganzi Schar verusä bättä. Det hät di ganz Gsellschaft riisigi Himmelslaternä und Wasserlaternä stiigä und schwimmä loh. Soooooo schön gsi! Nach derä wunderschönä Überraschig sind mir wieder inä go wiiter fiirä. Irgendwänn isch es hell wordä und mir sind nachemä 24 Stundätag überglücklich und uu müed is Bett gheit!

Am nächschtä Morgä händ mir zämägruumt, sind go Zmorgä ässä und händ üs dänn als überglücklichs Ehepaar uf dä Heiwäg gmacht. TZ hät üs no Gschänkli und Chärtli wo mir am Apéro übercho händ verbii brocht. Die händ mir dänn in Rueh mol durä gluegät, händ di gstaltetä Fläschä numol bestuunet und händ eifach nuchli vo üsem perfektä Tag gschwärmt

Jeeh Tinebine, das tönt wunderschön... Es het mi grad krüselet woni da gläse ha, dass mer glaub dis Herz ghört het chlopfe... I ha chli de Bammel vor dem Moment. Aber nachher gohts de sicher besser.
Danke für de Bricht und herzliche Glückwunsch zu eurer Hochzit

Das glaubi der... bin gspannt wies mim Papi und mer wird go. Euse Weg zum inelaufe esch leider nur ganz churz... Es sind nur öpe 7 Meter oder so...

Und dass denn no dSunne cho esch, wow! Das esch doch es schöns Zeiche :)

Hallo tinebine. ich wüsche Euch alles alles Gute für die Zukunft.

Verliebt, verlobt und Verheiratet am 11./19. Mai 2012

Tinenine... Ich han so müesse schmunzle bi dim Bricht - Wettertechnisch isch es. Eus genau glich ergange
Din Bricht isch wunderschön, hät mi grad chribblet... Gnüssed au no eui Emotione und die tolle Erinnerige as Fäscht! Ich freu mich uf d'Föteli!!

Liebe Tinebine - das tönt nach einem super schönen und sehr emotionalen Tag! Ich wünsch euch für die Zukunft alles Gute!