I der Chile het mim Ma sini Cousine drü Lieder gsunge: You are the sunshine of my life, One Moment in time und The Rose. Das esch sooooooooo schön gse. Sehr emotional und persönlich! Dört si mer immer wieder Träne cho und eg ha mim Ma sis Nastüechli sehr guet chönne bruche.

Vor der Chile si zwe Gruppe Spalier gstande. Sini früecheri Strassenhockey Mannschaft und mis Gschäft. So cool!

Am Apéro hei mir zerscht aui Gratulatione entgägegno. Das esch zwar relativ stressig gse aber trotzdäm schön. Es esch so schön wie d'Lüt sich für eim freue und die tolle Reaktione wo chöme. Eifach wunderschön! Vom Ässe hani leider nid vöu gha, aber das woni gässe ha esch super fein gse. Derfür hani ständig trunke. Aber nur Wasser, es esch jo so heiss gse. Nach de Gratulatione hei mer sogar no Zit gha, um mit es paar Gäscht chli z'rede. Und mir hei eus au no schnäu chli Zit gönnt. Das esch no schön gse, süsch wär das ganze fasch wie imene Film abgloffe.
Eusi Tätschmeister hei no e Ballonwettbewerb organisiert. D'Apérogäscht hei chönne es Chärtli usfülle miteme Gschänk wo si eus mache, wenn s'Chärtli gfunde und zrugggschickt wird. Das si alles roti Härzliballön gse. Es het eifach super usgseh wo si die de aui zäme abgloh hei!
Nachem Apéro si mer mitere Limousine witergfahre zum go Föteli mache. Dört si mir zwöi und eusi Trauzüge mit Partner mitcho. Es het guet do, mou chli usem Rummel use zsi und eifach chli Rueh ga. Mir heis natürlich gnosse i der Limousine. Die esch der Hammer gse. Mit allem Drum und Dra. Leider esch d'Fahrt zu der Fotolocation nur ganz churz gse, aber mir hei jo gwüsst, dass mir nachhär wieder id Limousine chöi wenn mer zum Restaurant fahre.
Föteli hei mer rächt vöu gmacht, es esch mer ömu so vor cho. Eg hoffe natürlich dass die aui toll wärde. Be scho soooooooo gspannt druf! Velich chöme mer si die Wuche no über. Juhuuuu
Zerscht hei mer Föteli mit de Trauzüge gmacht, aschliessend nur vo eus zwöi und zum Schluss si de no die gladene Gäscht au i Park cho zum cho fötele. Euse Fotograf esch super gse. Entspannt und easy. Dä het das super gmacht.

Und nachem Föteli mache hei mer wieder id Limousine chönne. Yeah! Dört hei mer d'Musig ufdräiht und natürlich der Prosecco ufdo und agstosse. Die Party kann beginnen! Es esch de nid be einere Fläsch blibe, mir hei die zwöiti au no grad köpft

Vorem Restaurant hets no einisch e chline Apéro geh. Eusi Gäscht si drum scho vor eus dört gse. Mir hei müesse es Härz useme Liintuech usschnide und nachär dört durelaufe. Jö, das hani mega härzig gfunde. Dört hets au wieder mega feini Häppli geh und derzue Champagner. Eg hät aber der Unterschied zum Prosecco vo der Limousine nid gmerkt... Aber hey, jetz chani säge dasi Champagner trunke ha. Hi hi hi.
Im Restaurant hets de so richtig agfange. Es esch immer öppis gloffe und eusi Tätschmeister hei es tolls Programm uf d'Bei gstöut. Mir hei "Schlag Andi" gmacht. Mir heisse jo beidi so und si gägenand aträte. Es esch genau s'gliche gse wie Schlag den Raab. Insgesamt hei mer öppe 8 Spieli gmacht dure ganz Obe. Z.B. hei mer müesse mit verbundene Auge Gägestand errote und Lüt a de Füess und Wädli erkenne. Das mues jo zum schiesse usgseh ha.
Be eim Spieli hei mer müesse es Ikea Möbeli zämestöue. Das esch chli fies gse, da si genau gwüsst hei, dass mi Ma überhaupt nid der Handwärker esch. Eg ha Hilf übercho und es het e anderi Frau für me dörfe schrube. Natürlich het sie de gwunne. Sowieso hani die ganz Zit Hilf gha. Sie hei eifach wöue, dass d'Brut gwünnt. Hi hi hi. Schlussändlich hani de au gwunne. Als Priis hani e Million übercho... e Million Sandchörner imene Schatzchischtli.
Was au no mega luschtig gse esch, esch s'Strumpfband hole. Mir hei das mitem Tätschmeister vorbereitet und es het süsch niemer dervo gwüsst: der Tätschmeister het e Stuehl vorbereitet, wo ganz vöu Sache inere Chischte drinne gse si. Mi Ma esch de unter mi Rock und het immer wieder öppis us der Chischte füre gno: e Bisszange, e Sunnebrille, e Taschelampe, e BH und Slip usw. Das esch bi de Lüt rächt guet acho und het für veli Lacher gsorgt. Zum Schluss het er de natürlich au no s'Strumpfband gfunde.

S'Ässe im Restaurant esch au der Hammer gse. Es esch alles sooooo fein gse und speziell agrichtet. Eifach Hammer! Es si aui mega begeisteret gse. Das het eus natürlich gfreut.
Nachem Hauptgang hei mir der Eröffnigstanz gmacht. Mir hei zum Lied vom Elton John "Can you feel the love tonight" tanzet. Das esch sooooo romantisch gse! Eg ha zwar am Afang völlig falsch tanzet aber zum Glück het das niemer gse unter mim Rock. Aber irgendwenn hani de der Rhythmus gfunde und de eschs tip top gange. Eg ha das extrem gnosse mit mim Ma z'tanze. Be völlig hin und wäg gse und ha nur Auge für ihn gha.
Nachhär hei aui chönne tanze. Be rächt überrascht gse wie vöu dass tanzet hei. Es si würklich fasch aui Gäscht uf der Tanzflächi gse. So cool!
Nach der Tanziilag esch s'Dessertbuffet parat gse. WOW! Der Hammer! E säge euch, das het sooooo vöu feini Sache gha, eifach gewaltig. Eg ha aber leider gar nümme rächt möge und ha nur ganz wenig gässe. Leider esch de au sehr vöu vom Dessert blibe si, wöu d'Lüt allgemein fasch nüt me hei möge ässe. Aber das woni gha ha esch eifach super fein gse.
Mini Kolleginne hei au no e Showiilag gmacht. Sie hei Schnitzelbänk gmacht und derzue no Zeichnige zeigt. Das esch mega luschtig gse. Zum Teil hets rächti Insider derbi gha, wo d'Lüt sicher dänkt hei: Hä? was söu das? Aber für me hets passt und eg be jo drus cho.
Eusi Tätschmeister hei no es Gästebuech gmacht für eus. Das esch au so der Hammer! Sie hei am Apéro vo aune Gäscht Föteli gmacht miteme Bilderrahme. Das hani gar nid mitübercho. Die Föteli hei si de im Restaurant usdruckt und is Album kläbt. Nachhär heui aui no e persönlechi Widmig chönne drischribe. Sone cooli Idee! Und d'Lüt hei sooo schöni und härzigi Sache gschribe, eifach so schön!
Leider esch der Obe vöu z'schnäu verbi gange. Am 01.30 esch der Car wieder parat gstande zum heifahre. Was mi Ma und eg aber nid gwüsst hei, esch, dass mir de no witergfahre si ad Aare in Solothurn. Dört hei d'Gäscht so ufene Art Teelichtli wo usgseh hei wie Blueme id Aare do. Dummerwiis het d'Aare überhaupt ke Zug gha, so dass die Liechtli de eifach fasch si blibe stoh. Aber es het trotzdem schön usgseh. Zuedem hei si no Himmelslaterne id Luft gloh. Das esch e wunderschöne Abschluss vo dem traumhafte Tag gse.

do no es paar Föteli

jö dandi, danke für dä schöni bricht!!!!

Jö hei Dandi was für ne wunderschöne Bricht, do esch me grad voll mit debii wenn me das liest . Super schöni Fötelis, s het ächt alles mega schön usgseh und dir gsänd total happy us zäme, alles Liebi für euch !