Am Friitigmorgä ben ech relativ früeh ufgstande, damit i nomol e Rondi met mim Rössli han chönnä dreie. Gschlofä hani öbrigens tiptop ond ech be au am Morgä öberhaupt ned nervös gsi. De beni hei go duschä ond ha gmüetlich mit mim Schatz zmorgä gässe. Nochhär händ mer mol is Restaurant müessä, wo mer alles chli händ müessä parat mache för de Samschtig. Am Nomi hani no schnäll be de Kosmetikerin verbii müessä ond de hed sie gfondä, sie well mich grad no schminkä förs Zivilä, das esch de ehres Hochziitsgschänk gsi. Dihei hani mi de parat gmacht ond no mini Täsche packt för de Samschtig ond de send mer zo minä Elterä abe gange, wo mer eus alli (insgesamt 11 Lüüt) troffä händ zom is Nochberdorf zfahre för die Zivil Trauuig. Ech ha die ganz Ziit druf gwartet, dass ech ergendwenn nervös wirdä, aber nüd esch passiert, ha sälber gstuuned. Am 10 vor 4i händ mer de müessä bem Standesamt si. Ond chorz vor em 4i esch de au eusä Standesbeamti uftaucht, mer händ super troffä, esch total en lässigä gsi. Die ganz Trauuig esch öpä 25 Minute gange, ond mer händ uh vell glachet, er hed das uf en total lockeri ond witzigi Art gmacht, mer send total begeischteret gsi. Mini erschti Unterschrift esch notürli ned grad werkli so usecho wie echs gärn gha hätt , aber egal… Wo alles verbii gsi esch send mer weder zu minä Elterä hei, det heds Apero gä em Gartä. Spöter händ mer de dinnä gässe, mini Elterä händ grilliert ond 2 Salat gmacht, esch tiptop gsi. Rechtig gmüetlich ond au mega loschtig, send au ganz tolli Lüüt debii gsi. Mini Muetter hed eus de no es Gschänk öberreicht. Sie hed för eus es Bild gmacht för id Stubä, händ mega freud gha! Zum Dessert han ech en „Hochziits“-Tortä gmacht gha, scho chli em Vorus. Ergendwenn viel spöter händ min Ma und ich eus müessä vonenand verabschiedä, er hed dihei gschlofä ond ech be minä Elterä, well ich am Morgä eh grad ha müessä mit eusnä Trauzüginne zum Coiffeur. Wo alli gange gsi send han ech no alles parat gmacht för de nöchschti Morgä ond be de mol langsam is Bett. zNacht beni de mol ufgwacht ond de beni plötzli zemli nervös gsi ond ha fascht nömm chönnä ischlofä, ergendwenn hani de aber au das weder gschafft.
Am Morgä am halbi 7ni hed de min Wecker glüütet, de beni as erschts mol go duschä ond bem zmorgä beni de weder zemli ufgregt gsi. Woni de aber am 8ti mit minä Trauzüginne be de Coiffeuse gsi be esch weder die ganz Ufregig wäg gsi. As erschts beni de mol gschminkt wordä ond nochhär hani ändli mini Frisur becho. Öpä am 11i send mer de weder dihei gsi ond händ no Birchermüesli gässe wo mis Mami för eus gmacht hed. Plötzli send mini Elterä ganz schnäll usem Huus gsi, well dFloristin cho esch onds ergend es Gheimnis vor mer gha händ, woni de spöter zgseh becho han. Min Struss händs mer de grad met ufe brocht ond die vo de Trauzüginne au, be mega begeischteret gsi. Die eint Trauzügin, dSchwöschter vo mim Ma, esch de vo mim Mami zu mim Ma ufegfahre wordä, well sie de mit ehm scho früehner hed müessä zu de Kapelle go. Wo sech de mini Muetter und mini Schwöschter händ sgfange aleggä beni weder ganz ufgregt gsi. De händs mech afo parat mache ond nochhär heds schlimmschtä agfange, mi Vater, mini Schwöschter und ich händ müessä warte bes 10 vor 2 esch ond mer händ döffä losfahre. Das send die schlimmschte 30 Minute gsi för mech, be fascht döredreit vor Ufregig. Ond de ändlich hani döfä is Auto istiigä ond es esch e wonderschönä Bluemäschmock voredruf gsi (Öberraschig vo minä Elterä). Plötzli esch die ganz Nervosität weder wäg gsi. Mit 30 km/h send mer de Richtig Kapelle gfahre ond alli Lüüt unterwägs send stoh bliibä ond händ glueged. Be de Kapelle hed alles tiptop klapped, dLüüt send scho alli dinnä gsi. Aso händ mer eus chönnä parat mache. Zu wonderschöner Panflötä-Musik send mer mi Vater ond ich de id Kapelle izogä. Au die Trauuig esch superschön gsi ond au mit chli Witz, eifach Perfekt. Ond ergendwenn esch de au scho de Ringtusch cho, hami so uf das gfreut, ändli die Ring chönnä zträge wo ech sälber gmacht han. Min Ma hed rächt zittrigi Händ gha, ech be total ruhig gsi. Nach ned ganz ehrä Stond händ mer de weder de Uszog aträte.
Wo mer us de Kapelle cho send, send einigi chlini Hürdä us Holz im Wäg gstandä vo de Arbetskollegä vo mim Ma, er hed mi de müessä det dröber träge, hilfe, ha ech angscht gha, das er mech gheie lot oder dröberstolperet. Grad nach dem send dSchuelkollegä vo mim Ma gstandä mit em dickä Holzbalke ond erä grossä Sagi, mer händ de zäme müessä de Balke versage…Nach dem mer das gschafft händ hani wiiter onde uf de Wisä plötzli vier Rössli met schön agleitä Riter entdeckt, mini Kolleginnä usem Stall, mis Rössli esch notürli au debii gsi, so schön, ha mer das emmer gwönscht! De ändli händ mer euse Apero chönnä eröffnä ond de esch scho bald mini nöchscht Ufgab cho, ha be de Musik wo min Ma debii esch müessä es Lied dirigierä. Chli spöter send mer de no go Fötelä ond zwöschedöre händ mer emmer chli met eusne Lüüt chönä plauderä. Am viertel ab 5i esch de eusi Kutschä itroffä, ech ha mer emmer e Haflingerkutschä gwönscht wenn i mol hürote. Öpä e halb Stond send mer unterwägs gsi, esch total gmüetlich gsi ond mer händ mol chli Ziit för eus gha. Onterdessä send eusi gescht scho mol richtig Restaurant gfahrä ond händ eus de det au empfange. Esch total schön gsi ufs Restaurant zuzfahre ond all die Lüüt det zgseh. Mer send de alli zäme i euse Saal, au dä hed mer mega gfalle ond händ mol am erschtä Tisch (Bruuttisch) platz gnoh, det händ mer de chli spöter dVorspiis gässe, mer händ nochhär be jedem Gang de Tisch gwächslet (händ 4 Tisch gha) ond händ sDessert de weder am Bruuttisch becho. Eus hed das mega gfallä, das mer be allne mol händ chönnä si. Mer händ no en Powerpoint Präsentation vorbereitet, mit Föteli vo eus vo ganz chli bis jetzt, das hed allne, aber vor allem de Elterä mega gfallä.
Vorem Hauptgang händ mini Elterä de en Öberraschig gha, sie hend en Magier lo cho. Das esch ächt de Hammer gsi, en halbe Komiker mit super Zaubertricks, er hed all Lüüt zum lache und zum stuunä brocht, esch ächt mega onterhaltsam gsi, eifach super! Es Öberistimmigsspieli händ mer au no müessä mache ond mer send werkli super gsi, hed nor ganz wenigi Sache gä wo mer eus ned ganz einig gsi sind z.b. wär besser chan Autofahre. Als Priis händ mer de es Chochbuech becho wo all eusi gladne Gäscht ihres Lieblingsrezept inedue händ, superschön gstaltet. Ond ech chochä sowieso mega gärn. Spöter heds de no es Spieli förd Gäscht gä, esch zemli amüsant gsi zum zueluegä, die händ alles gä! Ganz zum Schluss send mer de veruse gange, mini Schwöschter hed no Himmelslaternä organisiert ond de händ mer die no ufegloh, das hed so wonderschön usgseh, eifach toll! Die meischte send de langsam mol hei, aber mit es paarne send mer de zu minä Elterä abespaziert ond händ det no inerä chlinä Rondi chli plauderet ond öpis tronkä. Ond de esch es de ergendwenn Ziit gsi zum heigoh, min Ma und ech send de heigloffä ond vor euserä Wohnigstür send no paar Gschänkli gstandä us de Nochberschaft, so härzig ond de esch no e Zettel a de Türe ghanget mit witzigä Spröch drof. Min Ma hed de gseit. Es esch öper i euserä Wohnig gsi ond ech ha mega Angscht becho, well i ned gwösst han wär ond darom hani mer sSchlimmschtä vorstellt, aber es esch alles ganz Harmlos gsi. Es Kollegäpäärli vo eus (eusi Tätschmeischter) händ euses Schlofzimmer mit Härzliballön, Roseblätter ond Cherzli dekoriert, es hed mega schön usgseh. Mer send de öberglöcklech aber todmüed is Bett gange.
Ich gratulier dr ganz herzlich zur Hochziit!! Euch beidne alles Gueti für di gemeinsam Zuekunft! Merci vilmol für de Bricht. Es isch anschinend ganz en tolle Tag xi und ich mag dir das sehr gönne!
Herzlichen Glückwunsch auch von mir zu eurer Hochzeit und alles Gute für euer Eheleben! ------------------------------------------------------------------------ 10/01/10 und 28/08/10 ...wir sind überwältigt...
Anmelden
Am 10 vor 4i händ mer de müessä bem Standesamt si. Ond chorz vor em 4i esch de au eusä Standesbeamti uftaucht, mer händ super troffä, esch total en lässigä gsi. Die ganz Trauuig esch öpä 25 Minute gange, ond mer händ uh vell glachet, er hed das uf en total lockeri ond witzigi Art gmacht, mer send total begeischteret gsi. Mini erschti Unterschrift esch notürli ned grad werkli so usecho wie echs gärn gha hätt 
, aber egal…