Hihi jö danke Proeschu :)

I kennes ebe au ned ond ha nie en Situation gha woni ha "müesse" met öperem zschlag cho. Das esch för me nie es Problem gsi. Nächsteliebi esch bi mer gross gschriebe, i be so erzoge ond guet dor sLäbe cho. Aber bi dere Familie stohni ächt a.

Nei es esch kei grossi Familie, eher chli. I "muess" sie au ned so oft gseh, zum Glück
Aber wenn i sie gseh, esch emmer so es unwohlsie i mer dren. I chas eifach ned abschalte.
I möcht dene scho usem Weg go, aber es esch jo GGs Familie, er liebt die ond för en beni machi das gern. Es send jo nor einzelni Stunde wo i muess ushalte. Aber sogar denn hani Müeh ond cha mi eifach nöm ufes nächsts Träffe freue.

Mini Familie esch gross. Mer gsähnd eus relativ oft ond mer hälfed alli enand emmer wo mer chöned. Wenn es Fest esch, mached alli öpis deför. Die einte brenged das, die andere deses, alli hälfed ufrume ond jede verstohts, wenn ned emmer alli debi sii chöned. Es händ jo die meiste au no en aghüroteti Familie näbedra.

Bi sinere Famiiie esch das anders. Eine schaffet för es Fest, alli andere hälfed nüt, punkt. Wo ich vorgschlage ha, dass es doch em Organisator eifacher würd go, wenn jede öpis bitreit, send alli gäge me gsi. Das mached sie ned so, das wänd sie ned. Hingäge händs aber grad gseit, was sie den für Gschänk (als Dankeschön für dGastfründschaft) erwartet. !!! Ich möchti das aber ned so. Als Dankeschön för mini Gastfründschaft hätt ich lieber, dass mer förenand do esch, enand hilft ond ned eifach eine allei loht lo mache. I fende, wenn ich scho MUESS es Fest bi mer Daheim für die mache, denn dörf ich doch au säge, wie ich mer das vorstelle, wenn sie das jo au so mached ond sogar no Asprüch a eri Gschänk stelled.
I empfende eifach veles wo sie maches als komisch, egoistisch, unmoralisch und öberhaupt ned lustig (sie lache oft über Sache, wo ich ned verstoh).

Wie au emmer, i muess lehre demet omgo. Wenn denn mol es Baby do esch, säge mer denn wes lauft ond das münds akzeptiere.

@ elea
Das met de Bluetsverwandtschaft verstohni. I wet au ned met Lüt müesse Kontakt ha, obwohl is eigentlich uf die Lüt verzichte chan. Aber bi Bluetsverwandtschaft "muess" mer sech glaub scho chli füege. I möcht jo ned min GG met sinere Familie in Unstimmigkeite bringe.
Schad, dass du das met dinere Familie so hesch. Komisch, dass so "Differenze" innerhalb vonere Familie send, eigentlich send jo alli usem gliche Holz gschnitzt. Aber offebar ebe doch ned. Schad.

jo ha mit ihm gredet, scho mehrmals. aber jetzt a wiehnachte esch es serst mal eifach zwiit gange, so dasi brüelet ha ufem heiweg. denn het er scho gmerkt, dass es ned eifach nor "dahingesagt" esch vo mer.

er verstohts es stuck wiit. i verstoh aber au ihn. er kennt sfamilieläbe nor so ond meint, i müess mi halt nochli a dene eri art gwöhne. aber i möcht mi gar ned dra gwöhne, wells mer derewäg gäg de strich goht.

hingäge erläbt er i minere familie en ganz anderi site, wo ihm offesichtlich guet duet. er gspürt wies i minere familie esch ond findet das sehr schön. aber wäge dem möcht er natürlich ned sini familie "verurteile", för ihn esch halt sini familie bes er mech kennt het snormalste gsi.
er chonnt met minere familie sehr guet klar, fühlt sech sehr wohl ond het freud, dass er en teil vo sonere grosse familie chan sii. er freut sech emmer, wenn er öper devo trifft oder wenn er gseht wie mer förenand do send. er merkt scho, dass sini ond mini familie ganz unterschiedlich send. vellecht weiss er au ned so rächt, wie er demet sell omgo.

genau das meini. i bruche kei gschenk vo dene. mer händ jo alles was mer bruched. aber enand hälfe, för enand do sii, das sett ebe keis gschenk müesse sii, sondern selbstverständlich. aber vellecht ben ich do zu eng gstrickt, i weiss es ned.

i ha kei chance die tradition zbreche. aber i werdes uf jedefall versueche

Danke euch vellmol förs "zuelose"

was chasch mache esch, das wenn s nöchst mol öper anders esones fest organisiert, dass du denn of die person zuegosch ond direkt frogsch "cha i der öpis abneh?"! ond velecht merkes de eso dass das meh brengt als es gschänkt. ond so biete sis der denn hoffentli au a wenn du s fest organisiersch?